The Definitive Guide to Living in the Capital , Cairo , Egypt

كنا موجودين في المعادي، في شارع 9 وبندور على أكلة مختلفة، وكنا بنفكر ناكل حاجة صحية علشان الريجيم وكروشنا اللي بقت زي المفتش كرومبو، وفجأة ظهر قدامنا مطعم اسمه Wok and Walk، اللي بيقدم أكل صيني، وعلشان إحنا في كايرو 360 أكيلة قررنا ننسى الدايت وندخل نجرب المطعم بنفسنا علشان نقول لكم لازم تروحوا تاكلوا إيه من عنده.

المطعم صغير جدًا، وممكن تعتبره “كُشك”، ولكن صدق المثل اللي بيقول “قد النملة ويعمل عملة”، لقينا 5 ترابيزات بره، فدخلنا سألنا على المنيو، وأخدناه وقعدنا بره نشوف هنختار إيه، والحقيقة إحنا لو نعرف ان الأكل بيشبع كده، ماكناش طلبنا أكل كتير، واكتفينا بصنف واحد، وإحنا بننصحكم اللي أكلته على قده، ميجربش أكتر من صنف واحد.

قررنا نبدأ بشوربة “هوت آند ساور”، بـ20 جنيه، ودي شوربة متبلة بالصوص الأحمر وجواها فراخ ومشروم، وكانت مسكرة، وكان واضح فيها الخل والشطة والفلفل، وشرائح البصل.

المطعم مش بيقدم أكل صيني وبس، بيقدم نماذج من مطابخ تانية زي المطبخ الهندي، علشان كده طلبنا كمان تشيكن تاندوري، ودا كان عبارة عن علبة “كرتون”، جواها أرز بسمتي مسلوق، ومعاه قرنفل وحبهان وقرفة خشب وورق لوري وجواه صوص كركم، هتلاحظ إنهم ملونين الكركرم بالأحمر، وفي المجمل الأكل كان جبار، ورغم إننا كنا مش جعانين خالص ولكن خلصنا عليه.

كمان Wok and Walk، عندهم قسم خاص اسمه “اصنع علبتك المفضلة”، وقررنا نصنع المجد واخترنا كرسبي نودلز بـ23 جنيه، لحم بيف بـ33 جنيه، وكانت التجربة إيجابية جدًا. طعم مميز وبهارات تشجع على الأكل. 

كل منتجات المطعم بتكون في علب كرتون، ومعاها طقم “خشب”، تقدر تاكل بيه لو أنت متعود، أو معلقة وشوكة تاكل زي المصريين الطبيعيين، وفي الحالتين محدش هيبص لك ولا يقول لك حاجة لأن كل الناس في حالها فبلاش تتكسف وعيش على طبيعتك.