The Definitive Guide to Living in the Capital , Cairo , Egypt

بما أن الصيف دخل والكل بيجري على البحر علشان يهرب من حرارة الجو، قررنا إحنا كمان في كايرو 360 نخطف يوم للإسكندرية، نقدر من خلاله نغير جو ونهرب من طقس القاهرة. على أرض الإسكندرية كان مهم نروح نفطر على البحر في مكان مميز، وده اللي خلانا نتعرف على Sky boo اللي كان من أجمل الفيوهات على البحر في الإسكندرية.

خلال السطور الجاية هنقول لكم كل اللي محتاجين تعرفوه عن تجربتنا في المكان.

أولًا؛ تقدروا تحجزوا أي وسيلة مواصلات سواء قطار من رمسيس أو أي شركة من شركات النقل زي جو باص، وي باص، نايل باص،.. وغيرهم، أو تركبوا من رمسيس من موقف الإسكندرية، وإحنا اخترنا أننا نحجز Swvl وكان سعره للفرد من ميدان عبد المنعم رياض حتى ميدان أحمد زويل في الإسكندرية 140 جنيه.

وصلنا إسكندرية وأخدنا ميكروباص “مشروع” من على الكورنيش علشان يودينا بحري عند قلعة قايتباي، وبالفعل وصلنا قبل القلعة بشوية واتمشينا لحد جوا، ولو أنتم معاكم عربية هتدفعوا رسم دخول 10 جنيه، سواء كانت أوبر أو عربية خاصة، ووصلنا المكان اللي رايحين له مخصوص علشان الفيو، واللي كان عبارة عن مجمع مطاعم تابع لجامعة الإسكندرية، واللي محتاج شغل من الجامعة على الخدمات العامة ومستوى النظافة والتشطيب علشان يكون أرقى وأحسن.

من مطاعم وكافيهات المجمع، اخترنا Sky Boo علشان موقعه المميز، وبالفعل القعدة في المكان عظيمة، وبتخليك تستمتع بجد ببحر الإسكندرية الجميل.

طلبنا قهوة علشان إحنا مؤمنين إن المكان بيتعرف من قهوته، وكان سعرها 23 جنيه، وطعمها كان حلو وعجبتنا جدًا، ومع القهوة كان فيه مياه صغيرة طلبناها بسعر 14 جنيه، وده سعر عالي جدًا الحقيقة وياريت لو يعيدوا نظر في التسعير.

كمان طلبنا الإفطار الشرقي وسعره كان 50 جنيه في عرض خاص، وكان عبارة عن طبق فول محبيناش طعمه، وطعمية مقبولة وبطاطس بوم فريت جميلة، وكمان كان معاهم طبقين مخلل وطبق طحينة جميلة جدًا، ومفترض كان معاهم شاي بس ماحدش قال لنا ومشربناهوش، وخلينا نأكد ان كل الأسعار بيضاف لها 14% ضريبة.

المكان فيه مشكلة كبيرة وللأسف تخيلنا ننزل تقييمه جدًا، المكان على البحر وجميل جدًا والخدمة ممتازة والفطار نوعًا ما مقبول وهتنبسطوا من حاجات كتير، ولكن هتبقى فيه مشكلة هتبوظ كل اليوم، وهو أن المكان مش مكيف، وبيعتمدوا على مراوح موجودة في النص لتغذية المكان وهي مش بتوصل هوا لكل الأماكن خاصة الركن المطل على البحر.

تجربتنا الكاملة بأننا نخرج من القاهرة ونروح إسكندرية ونرجع في نفس اليوم رغم أنها مرهقة ولكنها ممتعة خاصة لما تكون في جروب صغير مهمته أنه يفصل ويغير جو ويشم يوود البحر، وتقدروا كمان خلال اليوم أنكم تروحوا حلقة السمك تختاروا الأكل اللي بتحبوه وتسووه هناك وتقعدوا تتغدوا على البحر، وألف هنا، ولما ترجعوا ماتنسوش أن الإسكندرية زحمة فتختاروا أفضل وأقرب مواصلة لكم من الطريق الصحراوي علشان توفروا في الوقت.

تقدروا تعرفوا أكتر عن المطعم من خلال صفحة الفيسبوك من هنا.