The Definitive Guide to Living in the Capital , Cairo , Egypt

رنا شرف

مافيش شك إن الأكل التركي له جمهور في القاهرة، وعلشان كده العاصمة المصرية فيها عدد كبير من المطاعم التركية، وده السبب اللي خلانا نروح مطعم تركي علشان نجربه، واختارنا مطعم “Nisantasi – نيشانتاشي” فرع سيتي ستارز.. في السطور الجاية هنعرفكم أكتر على تفاصيل تجربتنا هناك.

بمجرد ما دخلنا المكان لاحظنا ابتسامة فريق العمل المميزة ومقابلتهم الحلوة اللي مدية للمكان روح وطاقة إيجابية حقيقية، وعجبنا جدًا الجو التركي اللي مسيطر على المكان، بداية من الأغاني التركية، ومرورًا بالديكور اللي بيحمل طابع تركي، وانتهاء برائحة الأكل التركي طبعًا.

أول طبق جربناه هناك كان “بيدا” وده عبارة عن عجينة تركية أقرب للبيتزا، جربناها بالسبانخ، وكانت جميلة جدًا وممكن نقول إنها صحية وخفيفة، ودي سعرها 71 جنيه.

جربنا كمان بيدا باللحمة المفرومة والجبنة الموتزاريلا، وكانت معقولة، لكن الحقيقة عجبتنا البيدا بالسبانخ أكتر، ودي سعرها كان 88 جنيه.

كمان جربنا كبة بالنعناع، ودي عبارة عن لحمة مفرومة ونعناع وصوص، والحقيقة إنها عجبتنا بدرجة كبيرة، لأنها كانت خفيفة ومتسوية حلو، ودي كان سعرها 81 جنيه.

جربنا كمان سلطة الفتوش، واللي نزلت لنا مع عيش مقلي بزيت، لكن إحنا طلبنا منهم عيش عادي، والاستجابة كانت سريعة، وغيروها، ودي حاجة جميلة بتدل على حرص المكان على رضاء الأكيلة.

بعد ما انتهينا من الأكل، قررنا نطلب قهوة تركي، أصل ماينفعش مانشربش قهوة تركي في مطعم  تركي! والحقيقة إنها كانت فعلًا جميلة، وسعرها 27 جنيه.

بعد ما خلصنا القهوة، لقينا المكان جاب لنا شاي تركي هدية، ودي حاجة عجبتنا جدًا منهم، يعني كانت حركة شيك قوي.

المكان عجبنا، وأكيد هنزوره تاني.