The Definitive Guide to Living in the Capital , Cairo , Egypt

الأكل التركي له جمهور كبير، وبيتميز انه بيجمع ما بين المطبخ التركي والعربي والفارسي والكردي والهندي وغيرهم من المطابخ العالمية المشهورة، علشان كده من أهم الدول اللي الأكل فيها مميز هي تركيا، اللي من أساسيات البرامج السياحية عندها “الأكل”، وبما أننا في القاهرة وفيه مطاعم تركية كتير فتحت فقررنا نجرب واحد منهم، واخترنا مطعم nisantasi علشان ننقلكم تجربتنا عنه ورأينا في الأكل التركي اللي بيقدمه.

Nisantasi لهم أكتر من فرع ولكن إحنا جربنا فرع كايرو فيستيفال سيتي، وموجود في الساحة الخارجية للمول في الدور الثاني والمكان كبير وفيه إن وآوت إيريا، والديكور بتاعه بسيط وكلاسيكي بكراسي وترابيزات خشب كبيرة، وعندهم فريق عمل كبيرلدرجة مش هتعرفوا مين اللي بيقدم السيرفس عليكم لأن كل مرة هتلاقوا حد مختلف بيساعدكم، وده في حد ذاته جميل لأن الخدمة بتكون أسرع وأقرب حد بيلبي طلبك فورًا، والمنيو عندهم إلكتروني مش ورقي وتقدروا تختاروا من التابلت أو السكان كود.

حاولنا نخلي موظف التقديم هو اللي يختار لنا الأكل ولكن ده كان صعب ورفض بكل ذوق وبشدة، فقررنا نبدأ طلبنا بشوربة فراخ تركي وسعرها كان 59 جنيه، وهي عبارة عن شوربة بالأرز البسمتي والبصل وقطع الفراخ، وخلينا نقول أن النوستالجيا سيطرت علينا أول ما جربنا الشوربة، لأن طعمها كان زي طعم شوربة “الفول النابت” بتاع زمان اللي كان بيتعمل في الصعيد وقرى الدلتا، ورغم أن الفراخ ماكنش فيها تتبيلة مميزة إلا أننا نعتقد ده صحي أفضل ولو كانت فيها أي تتبيلة ماكناش هنحس بطعم الفول النابت اللي حقيقي نفسنا فيه ولو تعرفوه يبقى بالتأكيد هتشتاقوا له.

بعدها دخلنا على سلاطة تبولة، وكان سعرها 56 جنيه، وهي كانت عادية وللأسف حسينا أننا بناكل كزبرة خضراء ومالهاش أي طعم يخلينا نتكلم عنها، ولكن ممكن نقول أنها محتاجة تكة طعم مميز تخليها أفضل وتحافظ على أنها تكون سلاطة صحية بمكونات مميزة، وكمان طلبنا كبة بالنعناع بـ84 جنيه، وهي بتتعمل من الزعتر وزيت الزيتون والنعناع، وللأسف طلبناها علشان عاوزين نعرف طعم النعناع في الكبة هيكون عامل إزاي، ولكن هو كان ناشف ومن غير طعم والكبة ماحسناش إنها أفضل حاجة ممكن تتعمل وفيه أحسن من كده، ولكن أقنعنا نفسنا بأن دي الطريقة االتركية وإحنا اللي بنحب المصري، بس أكيد هي ماكنتش أفضل حاجة في الأكل ونتمنى المرات الجاية يكون لها طعم والنعنعاع يكون في التتبيلة فريش، وكمان كانت نازلة باردة مش سخنة.

أما الطبق الرئيسي فطلبنا طاجن فراخ صغير بسعر 163 جنيه، الطاجن بييجي بعيش مقفول فوقه وقبل ما يتقدم بيتفتح بالسكينة ويتقدم لكم الطاجن سخن وهي عبارة عن صدور فراخ بالزعتر وصلصة الطماطم والبصل والزعتر والفلفل، وبينزل معاها عيش يستاهل يتاكل حاف، وطعم الطاجن كان لطيف وعجبنا وبقينا ناكل الفراخ وحاسين إنها خفيفة جدًا، وصوص الطماطم كان عظيم وعجبنا لدرجة اننا كنا عاوزين نطلبه لوحده كده نغمز فيه، وفي النهاية المطعم قدملنا شاي تركي هدية وماحسناش بفرق عن الشاي العادي ولكن السيرفس عليه عجبنا، بأنه نزل لنا النعناع وسط مكعب ثلج علشان يحافظ عليه فريش وكوباية الشاي الصغيرة اللي بترمز للشاي التركي.

وأخيرًا، طلبنا طبق رول فستق تركي، وسعره كان 89 جنيه، وأكاد من فرط الجمال أذوب الحقيقة في الطبق ده، سكر خفيف، طعم مميز، خامات بجودة عالية، فستق كتير ونضيف، وحقيقي كان نفسنا نطلب منه تاني من جماله وحلاوته، وده مش محتاج وصف هو بس يتاكل كده بمزاج وهدوء وانبساط.

تقدروا تعرفوا أكتر عن مطعم Nisantas من خلال صفحة الفيسبوك من هنا.