The Definitive Guide to Living in the Capital , Cairo , Egypt

الأكل في مصر متنوع جدًا، وبجد هتلاقوا في مصر كل أنواع الأكلات اللي جاية لنا من كافة أنحاء العالم، وده لأن مصر دايمًا بترحب بكل الثقافات فيها وده عمره ما أثر علينا ولا على ثقافتنا وأكلنا المميز، والمرة دي قررنا نجرب الطبق الإيطالي. ومؤخرًا سمعنا عن Nino المصري اللي رجع مصر يفتح مطعم له بعد 30 سنة قضاها في إيطاليا، رحنا جربنا هناك البيتزا والمكرونة، وهنعرفكم تجربتنا هناك بكل تفاصيلها.

المكان عبارة عن إن دور صغير وقدامه آوت دور كبير، واللون الأسود بيغلب عليه، وفريق العمل كان فريندلي وحاول يساعدنا على قد ما يقدر سواء في الاختيار أو في القعدة والخدمة.

وبدأنا بطلب مكرونة تشيكن ألفريدو وسعرها كان 183 جنيه، وطعمها كان حكاية ومتخدم عليها كويس والخامات حلوة، وكمان طلبنا مكرونة بينة نينو وسعرها 259 جنيه، ودي بيتعمل شو وبتتحط في قالب جبنة بارميجان علشان تاخد طعمها ولازم تتحط سخنة، لكن للأسف المكرونة ماكنتش بدرجة الحرارة المناسبة وبالتالي طعم البارميجان ماكنش ظاهر ولا كأنه موجود ولكن المكرونة نفسها جودتها ممتازة بس ماكنتش زي توقعاتنا اللي رايحين عليها.

وبما أن المطعم إيطالي طلبنا بيتزا نابولي وكان سعرها 159 جنيه، ورغم طعمها اللي ماكنش أحسن حاجة ولكن انبسطنا أن فيه أنشوجة فيها بالجودة الممتازة دي، وبعدها جربنا بيتزا كواترو فورماجي “4 جبن” وماكنتش أفضل حاجة وفيه أماكن كتير جربناها بتعملها أفضل.

في المجمل تجربتنا مع البيتزا عندهم ماكنتش الأفضل، وخاصة أن البيتزا متسوية على الغاز مش على الحطب وده خلاها مش أفضل حاجة.

قررنا ندخل على الحلو ونطلب حلو إيطالي ولكن للأسف مالقناش حلو لأن الوقت كان متأخر والموظف رشح لنا أوريو مدنيس وكان عبارة عن آيس كريم مثلج مع أوريو وصوص الشيكولاته وكان سعره 99 جنيه، وطعمه عجبنا أكتر من البيتزا وبننصح بيه.

تجربتنا رغم أنها ماكنتش الأفضل ولكنها تستحق اننا نكررها تاني بعد فترة يكونوا ظبطوا الأكل لأننا نتوقع منهم الأفضل.

تقدروا تعرفوا أكتر عنهم من خلال حساب نينو على إنستجرام من هنا.