The Definitive Guide to Living in the Capital , Cairo , Egypt

من المعروف إن الأسعار في المطاعم اللي جوا الفنادق بتكون سياحية وعالية جدًا، وعلشان كده فيه ناس كتير بتفضل الأماكن اللي بره الفنادق. لكن لما نلاقي مكان فيه سعر مناسب وجودة عالية وكمان داخل فندق شهير، فدي حاجة تستحق نتكلم عنها!

مطعم louvre pub بداخل فندق بيروت مصر الجديدة، مكان مختلف في تفاصيله وخدمته وجودته، وكمان سعره مش غالي، ومناسب جدًا لقعدة حب، أو على حد تعبير الدكتور أحمد خالد توفيق مبتكر شخصية رفعت إسماعيل، سأظل أحبك “حتى تحترق النجوم”.

في السطور الجاية هنقول لكم على تفاصيل تجربتنا في المكان.

المكان بشكل عام مناسب نعتبره مكان رومانسي وينفع تمامًا لرانديفو أو خروجة عائلية مميزة بدون أطفال لأنه غير مناسب لهم، والقعدات هناك عبارة عن كراسي عادية كلاسيكية وكراسي طويلة اللي بيطلق عليها “كراسي بار”، والخدمة عندهم مميزة، والموظف خدوم وسريع في تلبية طلباتكم، والمطعم بيشغل أغاني لطيفة ما بين الكلاسيك والجاز وغيرها سواء عربية أو أجنبية، وتقدروا تعملوا عزومات وحفلات فيه.

قررنا نطلب كفتة داوود باشا من غير صلصة وكان سعرها 61 جنيه، وهي كانت قطع داوود باشا المميزة والمعروفة وكان طعمها حلو والتتبيلة مش فجة زي أماكن كتير، بالعكس كانت مظبوطة وطعم اللحمة واضح مع التتبيلة الهادية وكأنكم بتاكلوا أكل بيتي، ومن حلاوتها خلصنا الطبق كله قبل ما ينزل الطبق الرئيسي، ونزل مع الكفتة طبق خيار.

أما الطبق الرئيسي فطلبنا كوردن بلو بسعر 144 جنيه، وكان عبارة عن قطعتين من الكورد بلو المميزين وحجمهم مناسب جدًا لسعرهم، ولكن القطعة الأولى كانت مستوية كويس جدًا لأننا كنا طالبينها ويل دن، ولكن القطعة التانية كانت محتاجة تتسوى أكتر حاجة بسيطة ولكن ماكنتش أزمة ولا معضلة وأكلنا القطعتين اللي كان معاهم أرز، وحقيقي الطعم كان حلو وطريقة التقديم كانت لطيفة.

وطلبنا كمان من عندهم عصير ليمون بسعر 21 جنيه، لأنه ماكنش فيه غيره تقريبًا في المنيو مناسب لنا، لأن المكان بيعتمد على المشروبات الكحولية والمتوفرة بكل أنواعها وعلشان كده بنأكد أنه غير مناسب لأقل من 18 سنة، وماتنسوش أن الأسعار دي غير شاملة الخدمة والضريبة، وبالنسبة لعصير الليمون هو كان عادي زي أي عصير ليمون وان كان له مرارة بسيطة لا تذكر في الطعم.

التجربة في مجملها كانت لطيفة والخدمة ممتازة والمكان عجبنا وهنخليه معانا في قائمة الترشيحات لأماكن رومانسية وهادية في مصر الجديدة.