The Definitive Guide to Living in the Capital , Cairo , Egypt

حلاوة الأكل بنحسها في العادي بحاسة التذوق، ولكن في العصر الحالي بقت العين بتاكل قبل الفم، وده خلى للأكل طعم عادي، وحاسة التذوق بقت تتلاشى مع الوقت، لدرجة إن فيه أكلات لو شوفناها وشكلها ماعجبناش مش هناكلها! لكن مع مطعم Dans Le Noir الأمر مختلف، وده لأنهم بيعتمدوا على الأكل في غرفة مظلمة جدًا، والهدف منها أننا نحس باللي فقدوا حاسة البصر، وكمان هي فرصة لإعادة حاسة التذوق لحياتنا من جديد.

خلال السطور الجاية هننقل لكم تفاصيل تجربتنا في المكان وتفاصيله للمرة الثانية بعد ما كنا جربناه في بداية افتتاحه، وتقدروا تتعرفوا على تجربتنا الأولى من هنا.

تجربة فريق كايرو 360 ماختلفتش كتير عن المرة اللي فاتت، ولكن خلينا نوضح أننا هنحترم رغبة المكان في عدم إفشاء كل تفاصيل الأكل، وكمان مافيش صور للأكل، وهنقول على خطوط عريضة فقط لأنهم بيعتمدوا على انكم تستكشفوا الأكلات بنفسكم، ولكن العيب المرة دي أن كمية الأكل كانت قليلة عن المرة اللي قبلها، وكمان مافيش حلو، ولكن المميز المرة دي أنكم تقدروا تلعبوا ألعاب مميزة ولطيفة داخل الغرفة المظلمة اللي هي القاعة الرئسية للأكل، واللي طبعًا مانعرفش لها أي ديكورات وعليكم أنتم تتخيلوا الديكور وتتوقعوه، ولكنها بتشيل حتى 25 فرد.

اتصلنا بالمكان وحجزنا بالتليفون وبلغناهم الأكلات اللي مش بنحبها والأكلات اللي عندنا منها حساسية، علشان يشيلوها من قائمة الاختيار للأكل واللي بيختاروا معظمها من أكلات قدماء المصريين، ووصلنا المكان اللي أول ما دخلنا لقينا فيه دواليب صغيرة بتشيلوا فيها الموبايل وأي حاجة ممكن تنور في الضلمة حتى لو كانت خفيفة، لأنه ممنوع تمامًا أي نور، ورغم رهبة التجربة ولكن بمجرد ما تتشجعوا وتقعدوا وتتكلموا مع الموظف اللي هو بالمناسبة من المكفوفين هتحسوا براحة جميلة.

بدأنا تجربتنا بأننا أخدنا التعليمات من خالد وهو من ذوي الهمم “المكفوفين” وهو شاب جميل ودمه خفيف، وبعدها بدأنا نتحرك في طابور وراه لغرفة الطعام، ومرينا على غرفة الإضاءة فيها خفيفة جدًا كبداية، وبعدها غرفة مظلمة وكل ممر نمر فيه بيبقى مظلم أكتر من اللي قبله لحد ما دخلنا الغرفة اللي كانت خالية تمامًا من أي مصدر نور ومظلمة جدًا، ولكن ماتقلقوش هتحسوا بعد شوية والتعود على القعدة في الظلام الحالك ده هتحسوا بطاقة نور كأنها “طيف”.

كانت أول تجربة مع طبق السلاطة اللي كان معمول عن طريق مجموعة خضروات ومعاهم حاجة تانية أخدنا وقت علشان نعرفها ولكن في النهاية عرفنا هي إيه، وبعدها كان الطبق الرئيسي واللي كان أكلة من أكلات قدماء المصريين ومضاف ليها بعض الخضروات الجميلة واللي كان منها “مسكر” وطبعًا كان فيها قطع لحمة، وطبعًا بما أننا خبرة في كايرو 360 قدرنا نعرف الأكلة كاملة بمكوناتها، وكان نفسنا نقول لهم البهارات المستخدمة بس نسينا.

خلصنا الأكل وبدأنا في الألعاب اللي بتتلعب في الضلمة، أولها كانت لعبة XO ولعبناها مرتين نظرًا للتعادل في المرة الأولى، وكمان لعبنا لعبة معرفة الكوين، وللأسف فشلنا فيها لأن كان فيها خدعة مش أي حد يعرفها بس انبسطنا، وجينا بقى لأصعب لعبة وهي لضم الإبرة في الظلام الحالك، وطبعًا لو حد قرر يقول لكم تعلموا ده في العادي مش هتعملوه، ولكن مع الإصرار على التحدي اللعبة كانت ممتعة وأعتقد أننا كسرنا الرقم القياسي في سرعة لضم الإبرة بالخيط، لأننا فكرنا وشغلنا دماغنا واستخدمنا حاسة اللمس بطريقة ما فنجحنا في لضم الخيط بالإبرة بسرعة.

بعد اللعب جالنا عصير مستحيل تفكروا تشربوه في الحياة العادية، وهو مكون من 3 حاجات الأساس فيهم “الخضرة”، وبعد ما عرفنا مكوناته وعجبنا طعمه قررنا نعمله وندوقه لأهالينا في البيت من غير ما يعرفوا، وممكن أنتم كمان تعملوا ده لما تجربوا والتجربة تعجبكم.

التجربة كانت ممتازة والقائمين على المكان كأنهم أصدقاء مش مجرد مجموعة عمل، هتستمتعوا بيهم، ولسه عند رأينا لو عندكم خوف أو رهبة من الضلمة تقدروا أنكم تخوضوا التجربة لو عندكم الشجاعة للتغلب على المشكلة دي، وكمان هي في الأساس تجربة عظيمة لاستخدام حواس الشم واللمس والتذوق، وتجربة الحياة من غير نعمة النظر.

تقدروا تعرفوا أكتر عن Dans Le Noir من خلال صفحتهم على فيسبوك من هنا.