The Definitive Guide to Living in the Capital , Cairo , Egypt

القعدة الرايقة مع الناس اللي بنحبهم هي السعادة الحقيقية، والمرة دي زودنا عليهم أكلة هنية علشان تبقى القعدة متكاملة. قررنا نروح أركان بلازا الشيخ زايد واللي في الحقيقة اكتشفنا انه مكان جميل وكبير جدًا، وفيه كل المحلات والمطاعم اللي ممكن تتمنوها، وبعد لفة جوا المكان قررنا نجرب مطعم Crave اللي عجبتنا كلاسيكية ديكوراته وألوانه المميزة، وقررنا ننقل لكم تجربة فريق كايرو 360 في المكان وتفاصيله.

المكان قسمين؛ الأول “إن دور” وبتستقبلك في بدايته بوابة خشب بني مريحة للعين، والقعدة جوا أنتريهات تكفي 6 أفراد لكل ترابيزة، وفيه كمان “آوت دور” بديكور كلاسيكي مع ترابيزات وكراسي معدن بألوان هادية مميزة، وفريق عمل نشيط موجود دايمًا حواليكم.

قررنا في البداية نطلب فراخ ستريبس سعرها 140 جنيه، وبطاطس بوم فريت سعرها 39 جنيه، وكان طعمهم عادي مافيهوش جديد وكان نفسنا الستريبس تكون سبايسي ولكن للأسف ماكنش متاح وقتها، وطلبنا صوص سبايسي بس للأسف منزلش مع الأكل رغم تأكيدنا للموظف عليه.

كمان قررنا نطلب فيتونشيني تشيكن ألفريدو وكانت عبارة عن مكرونة بالفراخ وزودنا عليها ذرة حلوة، وكان سعرها 277 جنيه، وطعمها كان عادي والفراخ كانت قليلة والكريمة ماكنتش ظاهرة كطعم في المكرونة، والطبق ده لا ننصح به في الحقيقة.

وكمان طلبنا زومبي برجر وكان سعره 263 جنيه وهو عبارة عن ساندوتش برجر مش واو ولكنه مش وحش بس بالنسبة لسعره خلينا نقول إنه مافيش توافق بينهم، وبينزل معاه بطاطس فري.

كمان جربنا من عندهم مكرونة فرايد تشيكن مع ذرة حلوة بسعر 305 جنيه، وكانت غلطتنا اننا زودنا ذرة لأن المكرونة كانت حلوة والفراخ كمان ولكن طعم الذرة ماكنش لطيف بالنسبة لنا وكمان عندهم نفس مشكلة الكريمة اللي اتكلمنا عنها فوق.

وآخر تجاربنا معاهم كانت تشيكين Mcm وسعرها 295 جنيه، وكانت عبارة عن قطعة فراخ كبيرة متبلة ومقرمشة ومعاها 2 سايد وطلبنا بطاطس وخضار سوتيه، والطبق طعمه كان حلو ولكنه بارد بالكامل وخاصة البطاطس، ولما قلنا للموظف إنه بارد بدل لنا الخضار السوتيه بس مش أكتر.

التجربة بشكل عام كانت متوسطة ولكنها رايقة وهادية في أركان بلازا اللي الاختيارات جواه كتير جدًا.

تقدروا تعرفوا أكتر عنهم من خلال صفحة الفيسبوك من هنا.