The Definitive Guide to Living in the Capital , Cairo , Egypt

منطقة وسط البلد فيها مجموعة من المطاعم المميزة، ومنها 4 مطاعم على الأقل متخصصة تحديدًا في الأسماك بأشكالها المختلفة، والمطاعم دي تعتبر من أحسن المطاعم اللي ممكن تاكلوا عندهم، وكل واحد فيهم له طابع خاص، إنما الجديد اللي فاجئنا، إن فيه مطعم جديد فتح اسمه “Casa Rusta” وكان واضح من البداية إنه واخد ستايل مختلف تمامًا عن كل المطاعم اللي دخلناها قبل كده، إنه بيقدم حاجات جديدة ومطرقعة، علشان كده قررنا في كايرو 360 نروح ونجرب، وفي السطور الجاية هنقولكم على تجربتنا معاهم.

المكان رغم إن حجمه صغير، وفيه 3 ترابيزات بس Indoor وترابزتين Outdoor لكن ديكوراته كانت مميزة، ومستخدم فيها الخشب بكثافة، ومعمول بذوق عالي يديكم إحساس بالدفء، ويخليكم تنبهروا بيه.

كمان الإضاءة والأنوار واخدين ديزاين مواسير المياه، مع لمبات صفراء، بتدي أجواء رومانسية وهادئة، وكمان بيستخدموا علب للأكل وأدوات أكل “معلقة وشوكة وسكينة” من البلاستيك المخصص للاستخدام الواحد، يعني أنتم ضامنين إن محدش هيكون أكل قبلكم من الطبق أو أدوات الأكل.

قررنا نقعد في المكان الخارجي التابع للمطعم، وقعدنا ندور في المنيو لحد ما استقرينا على طلب شوربة فياجرا بالكريمة مخلية، بـ(55 جنيه)، ودي كانت عبارة عن (بلح البحر – جمبري – سبيط – بطارخ سبيط – وجندوفلي)، والحقيقة طعمها كان حلو بالرغم من إن الشوربة كانت خفيفة، وفعليًا كانت تكفي فردين مش واحد بس، وكمان جربنا نفس الشوربة بس “جرعة زيادة” بـ(80 جنيه)، ودي كانت بتختلف عن شوربة “الفياجرا” في إن فيها كاليماري ومحار وكابوريا وجمبري قشر، وكانت كبيرة جدًا جدًا ومتختلفش عن اللي سبقتها في الطعم والشوربة وكله.

كمان جربنا من عندهم مكرونة “بنا ألفريدو جمبري” بـ(68 جنيه)، ودي مكرونة بصوص الكريمة مع جمبري وجبنة “بارميزان” مرشوشة عليها، ومجرد وجود “بارميزان” على الأكل ده يخليكم تاكلوا بدون ماتفكروا في حاجة غير طعم الجبنة المميز، اللي بيدي حلاوة ملهاش مثيل، ونتمنى إنهم يهتموا بزيادة جرعة الجمبري، وزيادة كثافة الـ”وايت صوص” اللي كان صعب التعامل معاه لإنه خفيف.

كمان جربنا “بنا ألفريدو سي فوود” بـ(70 جنيه) وكانت مكونة من مكرونة وجمبري وكاليماري وصوابع كابوريا مع صوص الكريمة وجبنة البارميزان، وكانت جميلة جدًا والوحيدة اللي خلصناها في الأكل، برغم إن حجمها كان كبير، مع التحفظ على الكريمة اللي إحنا مش بنفضل إنها تبقى خفيفة.

مع الأكل نزل لنا طبق عيش محمص مجانًا، وكان طعمه حلو وملحه مظبوط ومتحمص صح، ده بالإضافة للخدمة اللي كانت جميلة، والعاملين في المكان لبقين ومبتسمين دايمًا، ويهمهم رضاكم في كل الأحوال.

في المجمل، التجربة كانت حلوة جدًا، وإحنا بنأكد إن المطعم الجديد ده هيكون منافس قوي وسط محلات السمك القوية والعريقة في وسط البلد، مع العلم إن المكان تابع لشركة Sea Food Factory، وهي واحدة من أكبر الشركات المستوردة للمنتجات البحرية، وبتوزعها في القاهرة والإسكندرية، ومعروف عنها إنها بتقدم أسماك وسي فوود مجمد من أجود الأنواع.