The Definitive Guide to Living in the Capital , Cairo , Egypt

دايما الفيو المميز بيفرق في الأكل وبيكون فاتح شهية طبيعي، ويا سلام بقى لما الفيو يكون على النيل مباشرة في وقت الغروب! ده شيء عظيم بيوديكم لعالم تاني، ويا سلام لما الفيو يكون معاه أكلة حلوة أو مشروب مميز، كدة تبقى المتعة اكتملت.. وإحنا في كايرو 360 كنا بندور على ده لما قررنا نروح نجرب مطعم Cairo Sky المعادي في نايل فيو جويل هوتيل واللي للأسف مقدرش يجمع بين الإتنين واكتفى بالفيو الجميل وبس. خلال السطور الجاية هنقول لكم على تفاصيل تجربتنا هناك.

أولًا إحنا قررنا نحجز في المطعم ده علشان على حسب صفحتهم هما بيعملوا كل يوم حفلات من 7 حتى 11 مساءً، فيها تخت ورقص شرقي وتنورة وفرقة عالمية “حسب ما وضحوا”، ومن هنا اتصلنا حجزنا علشان نروح نستمتع بالفيو والحفلات والأكل، بس طلع مافيش حفلة ورغم اننا اتكلمنا قبلها لكن ماحدش نوه أنه مافيش حفلات في اليوم ده، ورغم أنه مش مشكلة بالنسبة لينا ولكن كان لازم نوضح ده، مع العلم أنه في حالة وجود حفلات بيكون فيه رسم دخول للحفلة بيختلف في الويك إند عن الأيام العادية.

الفيو بتاع المطعم مميز لأنه عبارة عن مركب على النيل، وقعدته مريحة، فيها كنب وكراسي بطول المركب بمختلف الأشكال، أما فريق العمل فكان مميز وكلامهم حلو، لدرجة أن وقت ما قررنا نختار الأكل طلبنا من الويتر يرشح لنا أحسن حاجة، وهنا بكل ثقة قال لنا إن الأكل كله مميز وحلو، ولما سألناه عن الأسماك قال أضمنها 100% ولو طلعت مش حلوة هدفع أنا تمنها، بس مادفعش 🙂

طلبنا شوربة سي فود وكان سعرها 75 جنيه، ومحتوياتها كانت مستوردة مش بلدي، والكمية قليلة وللأسف الجمبري فيها صغير جدًا جدًا، وكمان كانت زفرة لأنه كان متقطع فيها سمك، وكمان طلبنا ميكس شيبس سي فود وسعره كان 114 جنيه، كان عبارة عن سبيط وكاليماري وسمك بياض وواحدة جمبري وطبعًا طعمه مش أحسن حاجة، ولما قلنا للويتر ملاحظتنا قال أه عارف وكان تعويضه أنه يجيب لنا 3 وحدات جمبري لأن الجمبري كان ناقص في الطبق، وطبعًا رفضناهم ورفضنا نكمل أكل.

كمان من ضمن طلباتنا كان سمك فيليه شيبس، بسعر 67 جنيه، وهو سمك بياض معمول فيليه ومقرمش بس طعمه مافرقش عن اللي قبله، وكان مع كل طبق بطاطس مش حلوة، وأرز صيادية لطيف نوعًا ما، وطلبنا سلطة طحينة بـ20 جنيه، ودي كانت أفضل حاجة في الأكل.

بعد الأكل طلبنا قهوة تركي سعرها 21 جنيه، لكن جودة البن ماكنتش كويسة وجات لنا باردة.

في المجمل تجربتنا في الأكل ماكنتش أفضل حاجة، وكمان مش أحسن حاجة ممكن نرشحها في المكان، لكن في المقابل استمتعنا بالفيو التحفة في المكان، لكن سيبنا الأكل ونزلنا اتعشينا في مكان تاني هنكتب عنه أكيد قريب.

وعلشان تعرفوا أكتر عنهم تقدروا تزوروا صفحتهم على الفيسبوك من هنا.