The Definitive Guide to Living in the Capital , Cairo , Egypt

فيه 3 حاجات لما بيتجمعوا مع بعض، بيكون لهم رونق مختلف في الأكل بره البيت، “الفيو – الجودة – القعدة الحلوة”، لأن لو الفيو حلو هيفتح نفسكم، ولو جودة الأكل حلوة هتاكلوا وتدفعوا بحب، ولو القعدة فعلًا حلوة ومريحة ده هيخليكم مبسوطين وقادرين تعيشوا اللحظة الممتعة، وده اللي كنا بنتمنى نلاقيه لما قررنا نروح مطعم أندلسية بالمنيل.

في الموضوع ده هنعرفكم أكتر على تفاصيل تجربتنا في المكان.

المكان على كورنيش المنيل، وبالتحديد داخل هابي دولفين، وفيه منطقة أطفال في المكان، وهتقدروا تقعدوا على فيو النيل اللي هيفتح نفسكم.

لكن للأسف، الحلو مايكملش، الكراسي والترابيزات خشب كلاسيكية من بتاعة زمان، وده في حد ذاته مش وحش، لكن مافيهاش حتى مفرش يجمل شكلها، والموود العام للمكان حزين ويدعو للاكتئاب، ومافيش أي ألوان مبهجة في المكان، وماكنش فيه الحاجة اللي تخلينا نعيش اللحظة، إضاءة خافتة جدًا، هدوء شديد مسيطر على المكان، أغاني تقليدية ومالهاش شخصية مميزة أو ملامح، ومسئولين السيرفس صعب توصلوا لهم لو أنتم على ترابيزة بعيدة شوية.

خلال تجربتنا في مطعم أندلسية جربنا شوربة لسان عصفور بـ30 جنيه، وكانت سخنة وحلوة ورغم إنه مافيهاش شيء مميز، لكنها كانت بيتي جدًا، وده عجبنا قوي، وكمان جربنا طبق محشي مشكل سعره 40 جنيه، وعبارة عن قطعة باذنجان أبيض وواحدة أسمر، وقطعة كوسة وقطعة فلفل ودول طعمهم كان أقل من العادي مش واو لكن في نفس الوقت مش وحش، وكمان الطبق كان فيه 6 قطع ورق عنب واللي كان متسقى في شوربة ضاني، ودي حاجة عظيمة لبعض الناس ومش أحسن حاجة عند ناس تانية، فخلوا بالكم لو مش بتحبوا الضاني تحددوا ده في الطلب بتاعكم.

كمان قررنا نجرب ميكس جريل الدولفين مشوي بـ185 جنيه، وكان عبارة عن قطعتين كفتة وقطعتين طرب وقطعتين كباب معمولين على طريقة الفاهيتا ونازلين بسخونيتهم والدخان خارج منهم والشو ده كان جميل، لكن اللي ماكانش جميل أن التتبيلة بتاعة المشويات مش قوية، ومافيهاش الإحساس بتاعة التتبيلة اللي بنحبها طول عمرنا.

تجربتنا في مجملها كانت معقولة، وأكيد لو هنكررها تاني هيكون بالنهار علشان يكون عندنا فرصة نتصور مع النيل ونشوف الفيو بشكل أوضح، وماتنسوش أن الأسعار غير شاملة الخدمة والضريبة وكل فرد بيدفع 7 جنيه مقابل الشوك والسكاكين.

تقدروا تعرفوا أكتر عن مطعم أندلسية من خلال صفحة الفيسبوك من هنا.

ولو حابين تتواصلوا معاهم أو تحجزوا ولطلب الدليفري اتصلوا على رقم 19412.