مش باقي حاجة من المرتب؟ 10 أماكن بتقدم لك أكل على قد الميزانية
Nagla Ashraf
مافيش أجمل من خبر أن المرتب نزل، بيكون له بهجة وشوق، اللي هو ياه ياه يا عبد الصمد، ومافيش 10 أيام وبنرجع نشتاق لسماع الخبر تاني، ولأننا كمحررين لكايرو 360 حريصين أنكم تنبسطوا وتخرجوا حتى لو اللي باقي من المرتب مش كتير، وسواء قررتم تطلبوا أكل في الشغل أو تخرجوا خروجة مختلفة ومش مكلفة خالص هتنبسطوا من المحلات دي، لأنها بتقدم أكل حلو جدًا ويتناسب مع اللي باقي في المحفظة من المرتب أخر الشهر.
مين يقدر يقاوم ريحة العيش البلدي السخن وهو طالع من الفرن بالذات لو بالردة؟ طب يا سلام بقى على واحد حوواشي كده وإحنا جعانين، والسعر زي الطعم حكاية ومعقول جدًا، أبو ردة من الأماكن اللي فاجأتنا باللي بتقدمه، ومناسب جدًا لميزانيتنا أخر الشهر.
الأكل السوري بالنسبة لنا هو المنقذ السريع والمضمون، ما بنقدرش نقاوم سحر المناقيش خاصة اللي بالزعتر، ده غير أنه بيعمل وجبات كمان، يعنى لو جعانين نص نص ينفع، ولو هنبدأ مرحلة فرهدة الجوع زي دركولا وهو بيبحث عن فريسة أنس الدمشقي هيوفر علينا المعاناة وهينقذنا برضه.
عشاق المكرونة اجمعوا هنا، عندنا اعتراف صغير أننا بنحب المكرونة أكثر من أي وجبة ثانية، لدرجة أننا ممكن ناكلها كل يوم ومانزهقش، طب إيه رأيكم بقى لما تبقى مكرونة معمولة بمزاج وبصلصة مختلفة مافيش زيها، بالرغم من بساطة المكان إلا أنه بيقدم أحلى صلصة للمكرونة ممكن تجربوها ومش هتصدقوا أسعاره!
في حاجات كتير مهما نوصفها ما بتتوصفش لازم تتاكل الأول وبعدين نحاول نوصف جمالها، وده اللي حصل لنا في الشافعي، اللي يناسب الأكيلة بس لأنه عنده ساندويتشات كتير بأسعار هايلة، وننصحكم تجربوا ساندويتش التشيكن رول.
من أحسن الأماكن اللي استمتعنا فيها بالمأكولات البحرية، وأخدنا قرطاس جمبري وكاليماري، وحلينا بفريسكا، بس الأكيد أن التتبيلة فيها سر عجيب بيجذبنا أننا نكرر تجربتنا مرة تانية، خاصة أن عندهم وجبات كمان.
من الأماكن اللي ظهرت بعد البرنس وبتنافسه بقوة في حلاوة أكلها، يعنى الطواجن والملوخلية والممبار وكل اللي قلبكم يحبوا بس إحنا مش مسئولين عن الانتفاخ والتخمة اللي هتحصل بعد الأكل.
الأكل اللي بمزاج وسعره مناسب عمرنا ما نشبع منه أبدًا، ويا سلام بقى لو كان مطعم مأكولات بحرية سر جماله في خلتطه صحيح هو فرع المنيل بيوصل بس، لكن مافيش مرة جربنا عنده حاجة وطلعت وحشة، بالذات الطواجن، وصيتكم الطواجن يا جماعة.
كل اللي فات ده كوم ومالمطعم ده كوم، أكل ماليزي وتايلندي بأسعار ماكناش مصدقين هي إزاي حلوة كده، لدرجة أننا كنا اتنين وحسينا أننا دفعنا حساب فرد واحد بس ي أي مكان تاني بالمقبلات والشرب وكل حاجة، الأكل خرافة والناس معاملتها حلوة جدًا، وكنا نتمنى أننا نسكن جنبهم علشان نفضل ناكل من هناك على طول.
ساندويتشات كبدة وبرجر حكاية، وكمان بتتفرج على السانداويتش بتاعك وهو بيعمله، ماكناش نتخيل أنه بيعمل برجر بالحلاوة دي وبالسعر الجامد ده، حكاية حب لأول مرة من طرفين، وضمرينا مش هيأنبنا أننا دفعنا مبلغ كبير في الأكل وإحنا أخر الشهر.
مش معنى أن المطعم في العجوزة أنه يكون سعر غالي خالص، تحابيش فاجأنا بمكرونة بالسجق معمول بمزاج وحب وتشكيلة أطباق تانية حكاية، خلانا عاوزين نرجع له على طول غير أنه بيقدم ساندويتشات كتير وبيوصل.
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
