الليل وسماه ونجومه وقمر من الحاجات اللي مصر كلها بتحبها، لأن الليل في القاهرة من أجمل الليالي على مستوى العالم نظرًا للطبيعة الخلابة الجميلة والجو الممتع في بعض الأوقات، وده اللي بيخلينا ندور دايمًا على خروجات ليلية في القاهرة، ومن الأماكن اللي لفتت نظرنا وقررنا في كايرو 360 نروح نجربها كان “ليل وخيل”، وهو عبارة عن واحة صغيرة فيها تفاصيل كتير واستمتعنا أكتر بالتصوير فيها وقت الغروب، وعلشان كده هننقلكم تجربتنا كاملة عن ليل وخيل خلال السطور اللي جاية.
واحة ليل وخيل موجودة في الشيخ زايد وهي عبارة عن مساحة واسعة مفتوحة وكبيرة فيها مطعم واسطبل خيل وبرجولات للقعدة مع كراسي وترابيزات للناس اللي محتاجة الهواء الطلق، ولكن أول نصيحة لكم بلاش تروحوا قبل الساعة 7 علشان حرارة الجو وكمان علشان تقدروا تستمتعوا بالغروب وركوب الخيل والتصوير.
وصلنا ليل وخيل وقررنا نطلب أكل لحد ما الجو يهدا ويخرجوا الخيل وكان اختيارنا الأول شوربة كريمة مشروم وكان سعرها 80 جنيه، والكريمة كانت خفيفة والمشروم قليل جدًا، كمان طلبنا شوربة لسان عصفور وسعرها 50 جنيه، وكان طعمها حلو وعجبتنا أكتر، ومعاهم كان طبق مكس مقبلات عبارة عن كوبيبة وسمبوسك لحم وسمبوسك جبنة ومحشي مشكل، وكان طعمه ممتاز وأكتر حاجة عجبتنا السمبوسك.
بعد كده دخلنا على الأطباق الرئيسية وطلبنا طبق لحم سيزلنج بالجبنة، وكان سعره 450 جنيه، وكان من المفترض أن هو استيك بالجبنة الزرقاء “ريكفورد”، ولكن التقطيع بتاع اللحمة لا يدل على أنه ستيك ولا التتبيلة ولا التسوية وكان صعب في أكله، والجبنة الزرقاء كانت عبارة عن صوص وطعمها يعتبر ضايع ومختلف تمامًا عن الطعم الأصلي وللأسف اتصدمنا منه.
كمان طلبنا فخارة ليل وخيل، وهي عبارة عن فخارة بطاطس باللحمة والبصل وسعرها 365 جنيه، وبتنزلكم بالفخارة وتتقلب في الطبق قدامكم، ورغم أننا رجعناها أول مرة علشان التسوية إلا أنها لما رجعت لنا تاني كانت اللحمة تقيلة في أكلها ومقدرناش نكملها، ولكن البطاطس كانت مستوية كويس عن الأول، وبكده نقدر نقول أن المكان في مستوى الأكل متوسط، وللأسف محبناش نجرب المشروبات بعد تجربة الأكل.
وقررنا نركب خيل وعندهم ربع ساعة خيل بـ200 جنيه غير شامل الخدمة والضريبة، وده سعره عالي جدًا ولأول مرة نعرف أن ركوب الخيل عليه خدمة وضريبة، ولكن الموضوع كان ممتع والصور كانت جميلة وعجبتنا الأجواء خاصة ان وقت ركوبنا كانت الشمس خلاص بتغرب والفيو تحفة، وخلوا بالكم أن الباركينج هناك بـ20 جنيه، والسايس هيطلب 30 جنيه فأطلبوا منه وصل الركنة وأدفعوا اللي مكتوب فيه بس.
العنوان: الشيخ زايد – شارع النزهة – أمام أبراج نجيب ساويرس.
وتقدروا تعرفوا أكتر عنهم من خلال صفحة الفيسبوك من هنا.
