The Definitive Guide to Living in the Capital , Cairo , Egypt

رنا شرف

الصورة الرئيسية: Ionela Mat

الصيف مرتبط معانا بالبحر، والبحر مرتبط معانا بأكل سمك حلوة، لكنك مش محتاج تسافر لمصيف علشان تستمتع بأكلة سمك حلوة، القاهرة فيها أماكن كثيرة بتقدم أكلات سمك فاخرة، ومنها ليتل أوشن، اللي فعلًا هيخليك تحس ببهجة وأنت بتسمتع بأكلة سمك حلوة وسط ديكورات جميلة بتنقلك لوالم تانية من المتعة.

المكان واسع شيك بدرجة كبيرة، وبمجرد ما تدخل ليتل أوشن هتحس أنك دخلت منتجع أو فندق مش مجرد مطعم أسماك، الإضاءة في المكان مميزة ودافئة، وبتديك إحساس بالفخامة. الكراسي مريحة جدًا والترابيزات شيك ومتجهزة باحترافية عالية وكأنك في مطعم داخل فندق 5 نجوم.

في ليتل أوشن الخدمة رائعة، وتقدر تختار كل السمك اللي يعجبك من ثلاجة الأسماك، وحقيقي كله طازج وبيتم اختياره بجودة عالية.

أول حاجة جربناها في المكان هي الملوخية بالجمبري، وسعر الطبق 150 جنيه، والحقيقة انبسطنا جدًا من كمية الجمبري وكمان طعم الملوخية، فعلًا حسينا أننا بناكل في مطعم على شط بحر إسكندرية.

جربنا كمان الكفتة بالجمبري، ودي سعرها 170 جنيه، وعجبتنا جدًا، وحسينا أنها مخدومة ومتسوية حلو ومتقدمة بشكل يخليك تخلص الطبق كله من غير ما تحس.

وعلشان ماينفعش نبقى في مطعم سمك ومانطلبش أرز صيادية، الطبق كان شهي جدًا ومعمول بمزاج عالي، وسعره 47 جنيه، والجميل أن الكمية حلوة وتكفي فرد ويمكن أكثر كمان.

تجربتنا بشكل عام كانت إيجابية، وبنرشح المكان لكل عشاق السمك، هتستمتعوا بالأكل والقعدة وبكل التفاصيل اللي في المكان.