The Definitive Guide to Living in the Capital , Cairo , Egypt

أوقات الواحد بـ يبقى محتاج أنه يأكل أكلة معمولة بفن، واللي للأسف مش سهل أنك تلاقيها في مطاعم القاهرة  أيًا كان مطبخك المفضل؛ بالنسبة لنا، أكلاتنا المفضلة بـ تنتمي للمطبخ الإيطالي، وبالرغم من أنه من أكثر المطابخ اللي بـ يساء تقديمها في مصر، إلا أنه ما زال فيه أماكن قليلة جدًا بـ تقدمه أحسن تقديم. لا روزا – La Rosa في دجلة المعادي هو واحد من الأماكن دي.

الجو العام في لا روزا بسيط جدًا لأن أولوية أصحاب المكان لجودة الأكل أكثر من أي حاجة ثانية؛ الإضاءة الخافتة والموسيقى الهادئة جدًا تساعدك على الاسترخاء والاستمتاع بالأكل وبس. أول ما دخلنا رحب بنا الجرسون وقدم لنا المنيو، لاحظنا تباين كبير في الأسعار، البيتزا والباستا مثلًا أسعارهم بـ تتراوح ما بين (27 و40 جنيه)، أما الأطباق الرئيسية فمعظمها أسعارها بين 75 جنيه و95 جنيه.

قررنا نجرب بيتزا فونجي (32 جنيه)، باستا تورتيلليني (34 جنيه) وفارفيللي لا روزا (35 جنيه). عن تجربة كنا عارفين أن الـ تورتيلليني مش هـ تشبعنا زي الاختيارات الثانية، لأنها تنفع أكثر كطبق جانبي. من عادة المكان أنه بـ ينزل خبز البروشيتا على الترابيزة قبل الأكل؛ الخبز كان رائع: مقرمش من الأطراف وطري من المنتصف ومكعبات الطماطم المتبلة أضافت الكثير للطعم النهائي.

بيتزا لا روزا تعتبر الأحسن بالنبسة لنا في مصر لسببين: أولهم أن العجينة الرفيعة مضبوطة ومقرمشة من غير ما تكون محروقة، والسبب الثاني هو أن بعكس أماكن كثيرة بـ تقدم بيتزا تجارية تدفع فيها 60 جنيه، سعر البيتزا عندهم رائع مقابل الجودة اللي بـ يقدموها. والكلام ده ينطبق على الفونجي، صوص الطماطم والمشروم كان شهي، أما كمية الجبنة فكانت مضبوطة بحيث أنها ما تغطيش على بقية النكهات.

للأسف الباستا ما كانتش بالجودة نفسها، عارفين أن باستا تورتيلليني –واللي هي عبارة عن عجينة مكرونة طرية محشوة بالجبنة الريكوتا والسبانخ، بـ يتم سلقها زي المكرونة العادية- تحضيرها صعب، لأن لها طريقة معينة في طيّ العجينة. بس في النهاية الطبق تم تقديمه ناقص تسوية، بالرغم من أن الحشوة كانت شهية التتبيل، ومتماشية نوعًا ما مع صوص الكريمة.

أما باستا فارفيللي لا روزا، فهي بالصوص الأحمر والسالمون المدخن واللي كنا متوقعين أن كميته تكون أكثر، ولكن الطبق ككل كان ممتاز.

بغض النظر عن الباستا، البيتزا كانت ممتازة، وبـ نعتبر لا روزا من أحسن الأماكن اللي بـ تقدمها بصورتها الأصلية، بعكس مطاعم كثير ثانية بـ تقدمها بشكل تجاري ومع ذلك لها شعبية.