The Definitive Guide to Living in the Capital , Cairo , Egypt

من يوم افتتاح مول مصر قدرت سينما VOX تثبت مكانتها كواحدة من أهم السينمات في القاهرة، بقاعات وشاشات عرض تحفة وبار سناكس جميل. أما لو كنت زي حالاتنا بتحب الأكلة الحلوة فلازم نقول لك على سر خطير؛ الجولد لاونج في سينما VOX لفت انتباهنا وخصوصًا إن المنيو مستوحاة من الشيف جاري رودز الحاصل على نجمة ميشلان.

اللاونج واسع وفيه كنب مريح لونه سمني ويعتبر مكان هايل لو عايز تتعشي قبل الفيلم، أو ممكن تقعد على الكراسي والترابيزات العاليين باللون الأسود لو عايز مشروب أو سناك سريع قبل ما يبدأ الفيلم. الجرسونات شكلهم مهندم وأجواء اللاونج لطيفة، أما الديكورات فتتميز ببساطة مع لمسة أناقة؛ من الأخر المكان مناسب جدًا للاونج في سينما. إحنا بنقدر جدًا الخدمة الكويسة في أي مكان، بس الموضوع هناك كان زيادة شوية لدرجة إن الجرسونات كانوا مصرين يشيلوا الفشار بنفسهم.

بعيدًا عن الفشار والمالتيزرز، رواد السينما يقدروا يستمتعوا هناك بأكلة لطيفة. إحنا عن نفسنا ابتدينا بطبق مقبلات كاميكازي شريمب Kamikaze Shrimp ثمنه (107 جنيه). المفروض إن الطبق عامل زي الشريمب ديناميت، بس اللي وصل كان جمبري مستوي بزيادة عليه مايونيز سبايسي، ونقصد بالتسوية الزيادة إنه كان صعب المضغ وله طعم مفحم شوية.

نفس الكلام بالنسبة للأطباق الرئيسية اللي طلبنا منها كراب أند أفوكادو توستد ساندويتش Crab and Avocado Toasted Sandwich ثمنه (102 جنيه) ونيو يورك ديلي ستايلد بيف سلايدرز New York Deli Style Beef Sliders ثمنه (141 جنيه). عمرنا ما كنا نتخيل لما قرأنا إن الطبق عبارة عن كابوريا وأفوكادو معاهم طحينة وسويت شيلي في عيش بلدي إنه يطلع حاجة قريبة من ساندويتش تونا في عيش بلدي فيه طعم سمك. بصراحة الموضوع كان محبط خصوصًا إن الساندويتش مالهوش طعم والكلام المكتوب في المنيو مختلف عن الحقيقة، والأسوأ من كده إن شكل تقديم الأكل نفسه كان سيئ جدًا، وحتى الطحينة وصوص السويت شيلي ماكانش ليهم وجود.

نروح على الطبق التاني اللي بينزل معاه كول سلو بالبصل وبطاطس محمرة – تعتبر أحلى حاجة في الأكل – وصوص “باربيكيو مدخن” طلع كاتشب أصلًا. بالنسبة للسلايدرز نفسها فاللحمة كانت سميكة شوية بس عصارية، أما العيش والإضافات فكانوا عاديين جدًا.

على أمل إن حظنا يكون أحسن مع الحلو قررنا نجرب باشون فروت أند مانجو تشيز كيكPassion Fruit and Mango Cheesecake ثمنه(62 جنيه). عجبتنا جدًا فكرة استخدام الكوكيز بالزنجبيل بدل البسكويت العادي، لكن المشكلة إن الكريمة ماكانش لها طعم مميز والباشون فروت والمانجو اللي تحت طعمهم يشبه عصير كانتلوب مسكّر.

الطبيعي إننا مش بنروح السينما علشان الأكل، بس الواحد كان فاكر إنه لما يدفع 412 جنيه هيجرّب حاجة جامدة، وبصراحة مش عارفين إيه رد فعل الشيف جاري رودز لو عرف إن المنيو دي مستوحاه من شغله. عايزين تعرفوا الهدف من الحكاية؟ خليكوا في الفشار والناتشوز وبلاش ابتكارات.