The Definitive Guide to Living in the Capital , Cairo , Egypt

يا ترى لما تحب تختار مطعم أو كافيه في إسكندرية أو القاهرة هـ تختاره على أساس موقعه ولا أكله ولا تصميم المكان نفسه؟… أكيد فيه ناس طماعة وهـ تحب تختار المطعم اللي فيه كل المميزات دي… وإحنا كنا من الناس الطماعة… وفعلاً قررنا نروح مطعم وكافيه “لاتينو – Latino”… وده لأسباب كثيرة أول حاجة أن موقع الكافيه يجنن… فهو موجود ضمن مجموعة كافيهات ثانية وعلشان تدخله لازم بـ تنزل بسلالم لتحت علشان تلاقي مدخله، وبالتالي “لاتينو” من الكافيهات القريبة جدًا للبحر، ده غير أنك تقدر تشوف فندق الفورسيزون اللي في سان ستيفانو من بعيد.. ثالث حاجة أن الكافيه نفسه بـ يتميز أنه واسع وتصميمه حلو، فهـ نلاقيه بـ يغلب عليه الديكورات الخشبية سواء في تصميمات الحوائط أو الكراسي، ده غير الكنب الجلد، والزرع الموزع في أركان المكان كله سواء جوه أو بره… أما بالنسبة للأكل بقى فده اللي هـ نوصفه لكم بالتفصيل.

أول ما دخلنا الكافيه طبعًا كان هدفنا أننا نقعد بره علشان نكون قريبين من البحر ونستمتع بالهواء… وعلشان السبب ده بدلنا الترابيزات تقريبًا 3 مرات لغاية لما وصلنا لأقرب ترابيزة ممكن نشوف منها البحر كويس، وبصراحة كان الجرسون متعاون معانا في الموضوع ده وساعدنا أننا نوصل للترابيزة دي…

جاب لنا بعد كده المنيو وقعدنا نختار كثير لأننا كنا محتارين من كثر ما معظم الأطباق كانت مغرية، استقرينا على الطلبات وطلبنا الأوردر، لكن المشكلة اللي لاحظناها أن الأكل هناك بـ يتأخر قوي يعني تقريبًا جاء بعد نصف ساعة أو أكثر وإحنا كنا جعانين جدًا… بس بعد ما جاء لنا الأكل لقيناه بصراحة يستاهل التأخير.

أخذنا طبق فراخ البراديز (53.50 جنيه) وهو عبارة عن قطعتين صدور فراخ مقلية ومتبلة عليها صوص كريمة وشرائح المشروم متغطية بجبنة موتزاريلا سخنة ومعاها بطاطس بيوريه وخضار سوتيه، والخضار بـ يتكون من قطع كوسة وجزر وفلفل ألوان ومربعات بطاطس بقشرها وفاصوليا وبروكلي معاهم مثلث عيش مغطى بزعتر، وفيه اللي طلب نفس الطبق بس معاه بطاطس بيوريه ومكرونة إسباجيتي بالصوص الأحمر (نفس السعر)، نيجي بقى لطبق فراخ المونتراي (57 جنيه) واللي كان عبارة عن قطعتين فراخ مشوية عليها صوص الباربكيو ومعاها شرائح بيف بيكون وجبنة شيدر سخنة، فيه اللي طلب جنبها خضار سوتيه وبطاطس بيوريه، وفيه اللي طلب معاها مكرونة بينّا بالصوص الأبيض وبطاطس مخبوزة ومفتوحة من النص ومحشية بالجبنة الموتزاريلا السايحة وقطع البيف، طلبنا كمان بيتزا بالتونة (42.75 جنيه) وكان عليها قطع تونة مع فلفل ألوان وزيتون وجبنة موتزاريلا وزعتر، وكمان طبق موتزاريلا مقلية (29.50 جنيه) واللي كان عبارة عن شرائح الجبنة الموتزاريلا المتبلة والمقلية ومعاها صوص المارينارا.

كان اللي بـ يميز كل الأطباق اللي طلبناها أن الأكل كان طعمه حلو ومستوي كويس، وكمان كميته كانت كبيرة.. يعني لو حد رايح جعان جدًا هـ ينسف الطبق كله، لكن لو مش جعان أوي ممكن ما يقدرش يخلصه للآخر… وبما أننا كنا جعانين جدًا فتقريبًا كانت الأطباق بعد ما خلصنا فاضية تمامًا.

لكن طبعًا بعد ما خلصنا ما سكتناش عند كده… قررنا نطلب الحلو اللي بـ نحبه جدًا وبـ يشتهر به لاتينو وهو “لقمة القاضي بالشوكولاتة” (21.75 جنيه) واللي كانت عبارة عن طبق حجمه متوسط بس مليان على آخره، وكان نصفه صوص شوكولاتة بني والنص الثاني شوكولاتة بيضاء، لكن المشكلة أنه تأخر جدًا أكثر من تأخير الأكل نفسه، يعني يمكن جاء لنا بعد ساعة إلا ربع، لكننا ما وقفناش عند طبق واحد، لأ ده إحنا كمان طلبنا أربعة أطباق غيره وأخذناهم معانا تيك أواي.

بصراحة إحنا اتبسطنا جدًا هناك، لأن لاتينو من الأماكن الحلوة في إسكندرية.. وده لأن الصبح بـ يكون منظر البحر جميل جدًا خاصة في الصيف.. وكمان بالليل بـ تكون الإضاءة في المكان حلوة سواء جوه أو بره.. علشان كدة بـ تتهافت ناس كثير أنها تروحه.