The Definitive Guide to Living in the Capital , Cairo , Egypt

السنة اللي فاتت جائت لنا الفرصة إننا نشهد افتتاح أحسن مكان بيعمل أكل مصري في القاهرة وهو مش أكتر من كشك أخضر صغير قصاد نادي الصيد. كيان كيتشين للأسف قفل بسرعة والسبب مش معروف، لكن من حسن حظنا أنهم رجعوا بفرع جديد فيه قعدة للأكل في المكان.

فرع كيان الصغير فتح على شارع النيل الأبيض المتفرع من ميدان لبنان في المهندسين، وفيه ترابيزة عالية وعليها 8 كراسي عاليين جنب المطبخ المكشوف علشان الناس تتسلى وهي مستنية الأكل. في كمان حيطة من الحجر عليها لمبات على شكل كلمة “حسيني”، وده مطعم أكل مصري جديد لنفس أصحاب كيان كيتشين. أما باقي المطعم فشكله ملخبط شوية بحيطان رمادي وكراسي مش مترتبة ومكتب الإدارة المفتوح من غير أي خصوصية.

طيب، خلونا نتكلم شوية عن الأكل؛ كيان يا جماعة معروف بساندويتشاته الجامدة، وعلشان كده طلبنا مشروم أند سويس روست بيف (45 جنيه) مع Slow-Cooked Beef Ribs (38 جنيه) و KayanBreaded Chicken (38 جنيه) ومشروم برجر (38 جنيه).

نبتدي الحكاية مع المشروم أند سويس روست بيف، وده عبارة عن كرواسون خفيف وطري محشي شرايح روست بيف رفيعة وطرية جدًا وعليها كمية كبيرة من المشروم المسبك مع صلصة البصل المعروفين بيها بطعمها المزز والمسكر في نفس الوقت وشوية زيتون وجبنة سايحة وصوص هوني مسطرد. بحكم خبرتنا الطويلة مع الروست بيف انبهرنا بصراحة من الروست بيف الطريعند كيان، بس صوص الهوني مسطرد بصراحة مالهوش محل من الإعراب.

نروح لساندويتش  Breaded Chickenاللي بيتقدم برضه في عيش “شياباتا-ciabatta”، ومحشي صدور فراخ مقلية عليها بافالو موتزاريلا سايحة وزيتون أسود وصلصة بصل ومكعبات طماطم مع صوص بيستو. صحيح في جزء من الفراخ كان محروق شوية، بس طعم مكونات الساندوتش كان قريب لسلاطة الكابريس وعملت شغل الصح الصح مع الفراخ.

أما ساندويتش Slow-Cooked Beef Ribs فبيتكون من مكعبات بيف صغيرة عليها صوص باربيكيو مسكّر وصلصة بصل – تاني – وكول سلو من غير مايونيز ألوانه تفتح النفس. الساندويتش ده برضه بيتقدم في عيش شياباتا مقرمش من بره وطري من جوه مكوناته بسيطة وطعمه روعة، بس المشكلة إن قطعية اللحمة الصغيرة كانت ناشفة ومش مناسبة للساندويتشات.

مسك الختام لمسابقة الساندويتشات الحامية دي كان المشروم برجر. تتبيلة قطعة البرجر العصارية وعليها مشروم مسبك وبصل مكرمل وجبنة شيدر، وطبعًا زي ما كلنا توقعنا “صلصة بصل”.البرجر بصراحة كان بينطق من جمال النكهات المسكرة والمززة اللذيذة، ويمكن لو قارنا حجم العيش بقطعة البرجر في الصورة هنحسها مش مناسبة، بس العيش فعلًا كان خفيف وهش جدًا.

نقدر نقول إن ساندويتشات كيان أقرب ما تكون للمثالية. يمكن اختيارهم لموقع الفرع غريب شوية، خصوصًا إن فكرة الساندويتشات الجورميه أحسن مكان لها في الزمالك أو المعادي عن شوارع المهندسين، بس على العموم الأكل كان تحفة وكل حاجة معمولة بمزاج، وكمان مكونات الأكل كلها طازة وأخيرًا العيش أكيد من كوكب تاني.