The Definitive Guide to Living in the Capital , Cairo , Egypt

الأكلة الحلوة بـ تبقى فرحتها مضاعفة لما تكون غير متوقعة، يعني إحنا عرفنا «كوفي بريك – Coffe Break» بالصدفة من صفحته على الفيسبوك، وفي يوم كنا عاوزين نفطر بره وحبينا نجرب حاجة جديدة فكلمنا المكان اللي واضح من اسمه أنه كافيه أكثر من كونه مطعم، لكن لما لاقيناه عامل منيو إفطار وسحور حبينا نستكشف المكان ونشوف الثقة دي جاية من فراغ ولا إيه؟

المطعم موجود داخل داون تاون مول في بداية شارع التسعين في الجزء اللي اسمه S2 في الدور الأرضي، فيه مساحة خارجية مفتوحة للجلوس وجزء داخلي أكثر هدوءً، وفيه شاشات تليفزيون بره بس، والقعدة حلوة وبسيطة لكن أجواء رمضان اللي مسيطرة على المول كله والزينة والفوانيس المعلقة في كل حتة هـ تخليك تحس أنك في كرنفال في داون تاون مول كله مش داخل مطعم بعينه، والفواصل بين أماكن الجلوس الخارجية قليلة وهـ تحس أنك قاعد بـ تفطر مع الناس كلها اللي هـ تبقى شايفهم من خلال الحواجز الزجاجية حولك، حبينا التجربة وأجواء الإفطار الجماعي ده.

بوفيه مفتوح للإفطار بسعر 89 جنيه للفرد غير شامل الضريبة والخدمة، يعني تقريبًا 110 جنيه للفرد. وممكن تطلب من المنيو العادي أطباق رئيسية من اللحوم والدجاج وتستمتع ببوفيه السلاطات، لكن إحنا حبينا البوفيه المفتوح بعد ما عرفنا الأصناف اللي فيه، وكان بـ يتضمن مشروب رمضاني؛ كركديه وتمر هندي وخروب وقمر الدين، وشوربة كريمة أو لسان عصفور، وبوفيه سلاطات ما حصلش فيه كل حاجة تتخيلها من أول سلاطة الطماطم لحد الكول سلو والفتوش وسلاطة الباستا بالتونة وخليط الجبن والمشروم وشرائح الببروني بالخضار، ومقبلات زي القطائف بالجبن والممبار والسبرنج رولز بالدجاج وكبيبة، وأصناف رئيسية هي الفتة بالعيش المحمص واللحم شيش طاووق ودجاج تندوري وكرات اللحم بصوص الكريمة والكفتة المحمرة والمكرونة البنا ومقلوبة البتنجان والأرز. وبعد كدة طبعًا منيو حلويات متنوع فيه فروت سلاد وأم علي وكيك وحلويات شرقية.

قبل المغرب بـ 10 دقائق ممكن تقوم تحضر أطباقك بنفسك، والجرسونات الودودين جدًا بـ يساعدوك في نقل الأطباق وهـ يجيبوا لك المشروبات اللي طلعت مش حلوة قوي للأسف لكن أهي حاجة تبل الريق. لكن مع أول معلقة شوربة بدأنا نفوق ونصهلل ونستبشر باللي جاي. شوربة قوامها رائع سواء الكريمة أو اللسان عصفور، والسلاطات كانت أروع حاجة حصلت لنا في التجربة كلها، فريش ومتنوعة ومافيهاش غلطة، وفي رأينا رمضان لما بـ ييجي في الصيف بـ يبقى محتاج سلاطات على الإفطار أكثر من أي أصناف ثانية. السبرنج رولز يُدرَس، مليان حشو وخلطته خطيرة من جوه. الكبيبة كانت مليانة نعناع وكان ظاهر بزيادة فما عجبتناش قوي. المقلوبة مش أي حد بـ يعرف يعملها، شرائح البتنجان المشوي مع الأرز واللحم المفروم، اختراع يستاهل أنك تيجي المكان مخصوص علشانه. فتة سوري وشيش طاووق وفتوش دي وجبة متكاملة في حد ذاتها هـ تلاقيها ضمن البوفيه، وممكن تعمل طبق باستا مع كرات اللحم وتدعي لنا.

سلاطة الفواكة فريش طبعًا وواضح أن المكان ده أستاذ في السلاطات، وأم علي كانت أحلى مما توقعنا وملينا طبقنا منها أكثر من مرة، والحلويات الشرقية لذيذة بس كانت أقل من باقي الأصناف.

تجربتنا في «كوفي بريك» كانت مفاجأة لأننا استمتعنا بالأكل جدًا رغم أن هدفنا الأساسي من الزيارة هو الاستمتاع بالقعدة الحلوة في داون تاون مول في رمضان، شكرًا للقائمين على المطعم على المفاجأة الجميلة ونتمنى لهم الحفاظ على المستوى ده بعد رمضان ونشوف فروع ثانية للمكان قريب.