The Definitive Guide to Living in the Capital , Cairo , Egypt

مين فينا ماعندوش ذكريات وحنين لمنطقة الكوربة الجميلة. لما نحب نتمشى أو نشرب فنجان قهوة بمزاج أو نأكل لقمة وسط العمارات القديمة بتصميمها الساحر، أكيد الكوربة من أوائل الأماكن اللي بتخطر على بالنا. طبعًا إحنا في كايرو 360 دائمًا بندور لكم على كل جديد، وعشان كده زورنا واحد من الإضافات الجديدة لمطاعم القاهرة وهو الكوربة لاونج وتجربتنا هناك كانت فيها نواحي إيجابية وسلبية.

قبل ما يفتح الكوربة لاونج كان في مكانه كافيه اسمها الفرندا، والمكان عبارة عن فيلا دورين بمنطقة أوت دوور واسعة ومخصصين جزء كامل جوه الفيلّا للأطفال مجهز بكراسي ملونة.

الكوربة لاونج بيقدم أطباق كلنا عارفينها زي فتوتشيني ألفريدو (44.95 جنيه) وبيف فاهيتا (74.95 جنيه) وكوردون بلو (79.95 جنيه)، وكمان المنيو فيها أطباق مميزة منها شريمب كاساديا (59.95 جنيه) وكوربة شريمب ستيك (119.95 جنيه).

اخترنا من قسم المقبلات طبق بوتاتو سكين Potato Skin (34.95 جنيه) وبعدها دخلنا على الكلام الكبير من قسم الأطباق الرئيسية وطلبنا كوربة تشيكن كوردون بلو (79.95 جنيه) وسكالوب بوكاتشيني (79.95 جنيه) وبيتزا تشيكن باربيكيو (54.95 جنيه).

نبدأ كلامنا عن البطاطس ونقول إن الطبق كان عبارة عن 4 أجزاء صغيرة من البطاطس بقشرها لسه طالعين من الفرن، ومحشيين جبنة سخنة مولعة، وعليهم أربع قطع بيف بيكون ومعاهم صوص سويت شيلي (رغم إنهم كاتبين في المنيو أنه ساور كريم) وبكده تكون بداية الأكل في منتهى الجمال ونكون نجحنا نجوعكم.

الدور بعد كده على التشيكن كوردون بلو، اللي كان معاه صوص برتقال غريب حوالين الفراخ وملهوش أي طعم يذكر، بس التتبيلة الممتازة لقطعتين صدور الفراخ الكبار المقليين صح ومحشيين جبنة سائحة مع قطع بيف بيكون صغيرة قدروا يعوضوا الصوص الغريب ده. طلبنا مع الطبق بطاطس محمرة وخضار سوتيه، وبكده يكون كله تمام.

السكالوب بوكاتشيني كان روعة، عبارة عن قطعتين كبار من الستيك المسلوق (مش مشوي زي ما مكتوب في المنيو) وعليهم صوص مشروم وفلفل أسود تحفة ومحشيين جبنة موتزاريلا وسالامي. الطبق بيتقدم معاه بطاطس محمرة لذيذة وأرز بسمتي ممتاز.

بعد الكلام الجميل اللي فات كان نفسنا تكون البيتزا على نفس المستوى، لكن بيتزا تشيكن باربيكيو للأسف كان متواضعة وعجينتها مش حلوة وكمان صوص الباربيكيو والبصل المقلي الزايدين عن اللازم عملوا طعم حاد جدًا. الحاجة الوحيدة الكويسة في البيتزا كانت قطع الفراخ اللذيذة، وفي الأخر قررنا نشيلهم من فوق البيتزا ونأكلهم لوحدهم.

مفيش في المنيو قسم للحلويات، وعشان كده روحنا نتفرج على بار الحلويات اللي فيه تشكيلة تقليدية من أطباق الحلو منها براونيز بالآيس كريم وتشيز كيك وشوكليت مولتن كيك.

قررنا نطلب تشيز كيك فراولة (34.95 جنيه) وفعلًا طلعت خفيفة وكريمتها لذيذة جدًا مع صوص الفراولة الممتاز، والعجينة كانت معقولة.

بعد المعركة دي كان لازم نطلب قهوة تركي (17.95 جنيه) تعدل دماغنا كان واضح فيها طعم الحبهان، ومعاها شيشتين عنب وبلوبيري (37.95 جنيه للواحدة) كانوا محتاجين يتخدّم عليهم أحسن من كده عشان يفضلوا مكملين معانا طول الوقت.

صحيح الخدمة هناك بطيئة جدًا (جايز عشان عدد الموظفين قليل) وفي أكلات مش معمولة كويس، بس من وجهة نظرنا إن كوربة لاونج بمساحته الواسعة وأجواءه المميزة، لو حصل شوية اهتمام بطعم الأكل، ممكن يحتل مكانة مميزة في منطقة هليوبوليس.