The Definitive Guide to Living in the Capital , Cairo , Egypt

ما بين محلات كتير بتقدم نفس المطبخ وهو الأكل العالمي قدر كريف – Crave مع السنين يحفر اسمه من ضمن المطاعم الراقية اللي مش بتتهاون أبدًا في جودة أو مستوى أكلها لكن مع الأسف مش كل المحلات بتقدر تحافظ على ده.

وبرغم حبنا الشديد لمطعم من مطاعمنا المفضلة كريف – Crave إلا أن التميز في تقديم كل الوصفات اللي موجودة في المنيو ما كانتش زي ما الكتاب بيقول، خصوصًا الوجبات الرئيسية، على عكس المقبلات اللي كانت هايلة كالعادة.

اخترنا من المنيو الكبير والمتنوع من بين المقبلات كنافة جمبري بـ 71 جنيه، و من منيو الأطباق الرئيسية بيتزا فونجي بـ 52 جنيه، وسلامون ترياكي بـ 137 جنيه، ومن منيو المشروبات اخترنا cup coder  بـ 31 جنيه، wild booster بـ 29 جنيه، وvimtojito بـ 30 جنيه.

أول حاجة وصلت كانت vimtojito واللي مكون من سفن آب وسيرب توت ونعناع وغزل بنات وطعمه حكاية، و wild booster واللي عبارة عن سفن آب وقطع ليمون وجنزبيل بيقدم في برطمان مثلج وطعمه منعش جدًا.

بعد كده وصل الجمبري الكنافة وهو من أطباقنا المفضلة، وكان سخن ومقرمش ونسبة الكنافة متناسقة مع حجم الجمبري مع صوص السويت أند تشيلي اللذيذ، زي ما هو من ساعة ما بدأ يُقدم مبهر ولذيذ.

بعد شوية وصلت بيتزا فونجي وكانت مليانة جبنة ومشروم بس للأسف تقريبًا مافيهاش صلصلة أو نكهة توابل من أي نوع، غير أن العجينة نفسها كانت أشبه بعيش مخبوز رفيع مالوش أي علاقة بعجينة البيتزا. فخاب أملنا جدًا الحقيقة كنا نتمنى أن يكون فيها طعم أكتر من كده.

أما بالنسبة للسلمون ترياكي، فإحنا كنا مأكدين على الجرسون أن الطبق يكون medium  ومش مستوي زيادة لأنه لو استوى زيادة بيكون طعمه سيء جدًا وأشبه بالسمك العادي.

وللأسف لما وصل الطبق كان فعلًا مستوي زيادة عن اللزوم ده غير أن كمية الخضار والصوص اللي فيه كانت قليلة جدًا.

كمان جربنا التشوكليت شيب لافا كيك بـ 41 جنيه، ودي عبارة عن مربع عجينة كوكيز مع أول معلقة بينفجر تيار شوكولاتة سايح مع بولة آيس كريم على الجنب، وكان طعمه تحفة زي عادة حلويات كريف.

خلصت تجربتنا في كريف فرع الزمالك، ونتمنى أن مطعمنا المفضل يصلح الأخطاء دي ويرجع مجده وسمعته المعروفة تاني.