The Definitive Guide to Living in the Capital , Cairo , Egypt

في أماكن بـ تجذبك أنك تروحها من اسمها بس وسمعتها الحلوة، وده اللي حصلنا لما عرفنا عن افتتاح فرع كركاس – Caracas الجديد في المعادي، فيلا كركاس في المعادي بألوانها المبهجة والحديقة الصغيرة اللي في مدخل المطعم، مع قصريات الزهور وشكل الكراسي والترابيزات البيضاء، والكراسي اللي شبه كراسي السفرة الأنيقة، المكان كله كأنه لوحة فنية ممزوجة بدرجات الألوان الزرقاء في الأبيض والروز والموف، كمان المكان أغلبه مفتوح إلا داخل الفيلا نفسها، فـ تحس كأنك في مكان جميل ألوانه مريحة للعين وروائح الأكل اللي بـ تشمها تنقلك لمكان ثاني خيالي كله جمال وراحة نفسية.

قعدنا في الأول على ترابيزة خارجية مطلة على الحديقة الصغيرة، واللي كان جواها عربية كارو لونها أبيض كنوع من أنواع التزيين، وبدأنا نسأل الجرسون على كذا حاجة ماكناش فاهمنها والحقيقة أنه كان متعاون معنا جدًا.

وبعد ما اخترنا الأطباق الرئيسية، كان لازم نجرب المشروبات خاصة أنهم عندهم تنوع غير طبيعي في أصنافها؛ بعد حيرة شديدة جدًا، طلبنا جلابينو بـ 22 جنيه، واللي طعمه يحسسك أنك بـ تشرب حاجة جميلة جدًا وغريبة في نفس الوقت، لأنه مكون من شراب الورد والجلاب (فاكهة لبناني) والمكسرات مع الثلج المجروش، كمان عصير داون تاون بـ 25 جنيه، كان لطيف واللي مكون من أناناس وكيوي وبرتقال، الليمون بالنعناع بقى واللي بـ 20 جنيه، كان طازج ومنعش، أما القهوة اللبناني بـ 15 جنيه، فكان لا يُعلى عليها.

طلبنا كمقبلات منقوشة زعتر ولبنة بـ 31 جنيه، وصفيحة جبنة حلومي بحبة البركة بـ 31 جنيه. الحقيقة أن منقوشة الزعتر برغم أن حجمها صغير إلا أن طعمها وهمي خاصة أنه كان عليها من فوق لبنة لبناني طعمها خفيفة ورائع، تخليك مش عاوز تخلص أكل أبدًا، وعاوز منها على طول، أما صفيحة جبنة حلومي، فكانت عبارة عن أربع مربعات عجينة مخبوزين وجواهم الجبنة الحلومي وعليهم حبة بركة من فوق، وكان طعمها رائع برضه.

أما بقى التحابيش اللبنانية والبهارات العظيمة وجمال لبنان كله كان في الوجبة الرئيسي، طلبنا دجاج ديجه بـ55 جنيه، وشيش براك بـ 60 جنيه. نحب نعرفكم بشيش براك الأول، واللي هو عبارة عن قطع عجينة صغيرة جدًا، في حجم عقلة الأصبع جواها لحمة مفرومة وبـ يضاف عليها أمامك صلصة طماطم ولبنة وسوميك (توابل لبناني)، وبـ تسيبها لفترة علشان تشرب الصوص، ودوق أجمل طعم ممكن تأكله في حياتك ما بين المزازة والحلاوة والبهارات، شيء لا يصدقه عقل. أما دجاج ديجه، فده طاجن فراخ مشوية بالفريك، كل حبة فيه معمولة بحب، الدجاج كان متبل كويس جدًا ومطبوخ تمام لا مستوي زيادة وجاف ولا نييء، وده كان شيء مبهج في حد ذاته.

طبعًا ما قدرناش نقاوم وجود عروس لبنان بـ 39 جنيه، والحقيقة أنها عروسة لبنان فعلًا، وممكن مصر والدول العربية كلهم كمان، وهي أكلة مشهورة في المطاعم اللبنانية بـ تبقى عبارة عن طبقة بسكويت وعليها آيس كريم مستكة وجبل من ما يشبه الحلاوة الشعر، كل معلقة بـ تعمل مزيج ما بين الثلاثة، علشان تستمتع بطعم تحفة ومزاج عالي في صنع الحلويات.

تجربة كركاس مما لا شك فيه تجربة رائعة ومبهجة، أكيد مش هـ تكون زيارتنا الأخيرة لهم، وننصح بالذات العائلات اللي بـ تحب تخرج خروجة مختلفة يوم الجمعة، كركاس مالوش حل، لازم تجربوه.