The Definitive Guide to Living in the Capital , Cairo , Egypt

كلنا لاحظنا انتشار إعلانات مطعم كبدة وشاوما على وسائل التواصل الاجتماعي، وده بيدل على إن القائمين عليه فاهمين سوشيل ميديا كويس قوي وعارفين يستغلوا ده بشكل صح جدًا.. لكن هل المكان نفسه بيقدم أكل مميز؟ فريق كايرو 360 راح فرع الدقي وجربنا الأكل هناك.

في البداية المكان موقعه كويس جدًا، قريب قوي من ميدان الدقي، ومن ميدان المساحة، والمكان نجح فعلًا يجذب أكبر عدد من الشباب، لما تروح هناك هتلاقي زحمة حقيقية هتفكرك بزحمة مطاعم الجامعات. كلهم شباب. يعني بنتكلم عن مطعم شبابي بامتياز.

المكان بسيط، أول ما بتدخل بتلاقي عدد ترابيزات قليل جدًا، وأغلب الناس بتفضل تاكل في الشارع أمام المطعم مش على الترابيزات اللي في الداخل.

الموظفين هناك محترمين جدًا وبيعاملوك بطريقة حلوة، ودي حاجة تحسب للمكان.

طلبنا ساندوتشات كبدة إسكندراني، وبتتقدم في الخبز العادي اللي بيتقدم في أي عربية كبدة في القاهرة، ومع الأكل بينزل لك كوب سلاطة خضراء صغير.

الأكل عادي جدًا زيه زي أي ساندوتش كبدة بتقدمها عربيات القاهرة اللي في الشارع، لكن الكبدة هناك حراقة جدًا، والفلفل كتير، ودي حاجة استغربناها، يعني لو مالكش في الحراق مش هتستمتع خالص بالأكل.

طلبنا كمان شاورما، وبرضه كانت عادية جدًا يعني مافيش أي حاجة بتميزها، زي اللي بتتقدم في أي مطعم، وطبعًا أقل بكتير من مستوى الشاورما اللي بتقدمها المطاعم السورية المشهورة.

يمكن الميزة في المكان هو الجو الجميل الشبابي اللي بيخليك تحس إنك في النادي مثلًا أو الجامعة، ده غير طبعًا الأسعار الرخيصة يعني تخيل إننا طلبنا عدد كبير من الساندوتشات ودفعنا في النهاية 47 جنيه بس! يعني ساندوتش الكبدة بـ 4 جنيه بس، وساندوتش الشاورما 12 جنيه.

نسينا نقول لكم إن نظام الدفع مختلف عن باقي المطاعم، الدفع مقدمًا، يعني لو دخلت قعدت جوه وطلبت، لما الأكل بيجيلك الموظف بيطلب الحساب على طول مش بيستنى لما تخلص أكل.

تجربتنا هناك كانت لطيفة، الأكل عادي، لكن القعدة حلوة وشبابية ومريحة، والموظفين كلهم شباب وبيستقبلوك كويس.