The Definitive Guide to Living in the Capital , Cairo , Egypt

“كبدة البرنس” من أشهر المطاعم المشهورة في القاهرة بأنها بتعمل أكل حلو ولحم بجودة عالية وخدمتهم كويسة، ومانعتقدش أن فيه حد في القاهرة ممكن تسأله عن المكان إلا وهيكون عارفه، وهو من المعالم اللي بفضل كتير من زوار القاهرة زيارتها في المدينة. لكن للأسف تجربتنا الأخيرة كانت سلبية، علشان البرنس مبقاش زي زمان، وخلال السطور الجاية هنقول لكم على تجربتنا مع مطعم كبدة البرنس الشهير.

أولًا، رحنا هناك وكالعادة أخدنا رقم حجز من كتر الزحمة وكنا رقم 3 وانتظرنا تقريبًا 20 دقيقة، والمكان خلية نحل وناس شغالة بتعمل كل حاجة وكل صالة لها مسئولين عنها بيجاهدوا علشان يساعدوكم، ورغم كده لما كنا بنحتاج حاجة بندور عليهم، علشان هما بيعملوا حاجات كتير لكل العملاء، وده شيء نشكرهم عليه.

بدأنا نطلب، وأول حاجة جت كانت السلطات اللي هي مجانًا، وبدأنا بطلب شوربة لسان عصفور وسعرها 15 جنيه، وكانت عبارة عن طبق شوربة ومتقطع جواه قطع فراخ، وكطعم هي عادية جدًا وجربنا في مطاعم تانية أحسن منها في التتبيلة والطعم. طلبنا كمان شوربة كوارع وسعرها 60 جنيه، وعلى الرغم أنها كانت حلوة إلا أننا للأسف بقينا نعاني بسبب أن الكوارع مش متقطعة وجاية قطعة واحدة كبيرة، لا عرفنا نقطعها ولا عرفنا ناكلها، وبهدلتنا.

طلبنا رغيف حواوشي بـ60 جنيه، وهو أقل من العادي، الطعم معجبناش خالص، وحقيقي المطعم لو مش هيطور المنتج ده، ويعمله حلو زي منافسين كتير للبرنس، يبقى بلاش منه أحسن لأن حرام فيه الفلوس.

دخلنا على الطلبات وطلبنا طاجن فريك باللحمة، وسعره 110 جنيه، واللحمة كانت حلوة ومستوية كويس وطعمها جميل، ولكن الفريك محتاج يكون أحسن من كده بكتير، لأنه ماكنش مستوى كويس وكان ناشف زيادة عن اللزوم وطعمه ماكنش التوب.

وكمان طلبنا موزة جريل مخلية وسعرها 200 جنيه، والحاجة الوحيدة اللي كانت واضحة فيها إنها ضاني علشان ريحتها بس مش أكتر، لكن الطعم مش لطيف والبصل والخضروات فيها كتير.

ماكناش مبسوطين من تجربتنا الأخيرة في كبدة البرنس، وعرفنا معلومة مش متأكيدن من صحتها، وهي إنه يوم الثلاثاء والأربعاء من كل أسبوع، الأكل مش حلو عند البرنس لأن الشيفات الأساسيين بيكونوا إجازة وده بيقلل من مستوى الأكل، ولو المعلومة دي صح فتبقى مصيبة!

وعلشان تعرفوا أكتر عن كبدة البرنس تقدروا تزوروا صفحتهم على فيسبوك من هنا.