The Definitive Guide to Living in the Capital , Cairo , Egypt

توين تاورز فى الشيخ زايد؟ فين المكان ده؟.. ببساطة موجود جنب مبنى كابيتال بيزنس بارك اللى كتبنا لكم عنه قبل كده وكتبنا مقالات عن جوبيل – Jubail، ومولوية لاونج – Mawlawiyah Lounge، وشكسبير أند كو – Shakespeare & Co، وأخيرًا أ تابلا – A Table، تجربتنا المرة دي بقى فى المطعم الوحيد الإيطالى اللى فاتح فى توين تاورز وهو كانيرو – Cannero واللى فيه كمان كايروكي ودي جي بـ يلعب مزيكا لايف فى المكان.

المكان متقسم لجزئين: جزء خارجي مفتوح وفيه دفايات وممكن يجيبوا لك بطاطين علشان السقعة والهوا، وجزء ثاني داخلى مقفول وفيه دي جي بـ يلعب مزيكا لايف زي ما ذكرنا وناس بـ تغنى كاريوكي، المنيو عبارة عن ورقة كبيرة هى الـ Cover بتاع الترابيزة، خطها صغير جدًا قعدنا نركز شوية فيها خاصة أن المكان نوره خافت، المنيو مقسمة لأقسام كثير نسبة كبيرة منها أكل إيطالى وفيه جزء منها للستيك والمقبلات المختلفة.

اختارنا شوربة فراخ بالمشروم (25 جنيه) بس طلبنا نشيل المشروم، وباستا بنا بالكارى (47 جنيه) ولأننا دايمًا بـ نحب نجرب الأطباق اللى بـ تحمل اسم المكان طلبنا بيف فيليه كانيرو (89 جنيه)، وجريك سلاد (30 جنيه)، ومن المقبلات لقينا صنف لا يمت للإيطالى بأى درجة قرابة هو ميني حواوشي (32 جنيه).

لازم نقول حاجة مهمة، لو أنت مالكش فى المزيكا العالية والكاريوكي -زي حالاتنا- مش هـ تحب المكان ده، يا إما تقعد فى المنطقة اللى بره زينا، صوت المزيكا فى المكان هـ يحسسك أنك فى مكان سهرة، والكاريوكي يبقى حظك حلو لو اللى بـ يغني صوته رقيق أو بـ يعرف يغني أصلًا، نخش على المهم.. الأكل.. الشوربة أول حاجة وصلت، قوام الشوربة كريمي لا خفيفة ولا ثقيلة، قطع الفراخ كانت صغيرة أوى ومستوية كويس وكميتها معقولة.

الميني حواوشي كان أكثر من رائع، تتبيلة اللحم مع تسويتها وريحتها والعيش البلدي اللى فيه كان طرى مع قرمشة خفيفة على الأطراف وبـ ينزل معاها سلاطة طحينة، مقطع لأربعة أرباع، كنا مستغربين بس أننا كنا بناكله مع أكل إيطالى، الباستا كانت كميتها كبيرة جدًا ممكن تفطس لو أكلتها لوحدك (تكفى فردين)، الباستا كانت مستوية كويس مش ألدنتى والكارى عليه كريمة فأعطتها لون مميز وقوام كمان مختلف وعليها جبنة بارميجان بس ما حسيناش بها أوى لأن طعم الكارى كان غالب على الطبق.

نيجي بقى للبيف.. كان معاه صوص مش واثقين هو مشروم ولا الصوص العادي بتاع الستيك بس كان طعمه حلو أوى، ومستوي Well-Done زي ما طلبنا وطعم اللحم نفسه كان حاو أوى، واضح أنهم مختارين قطعية لحم حلوة، وبـ ينزل معاه طلبين جانبيين اختارنا سوتيه وبطاطس مهروسة، كمية الأكل برضه كانت كبيرة والسوتيه فريش ومستوي كويس.

ما قدرناش نطلب أى مشروبات أو أى حاجة حلوة لأننا ما كناش عارفين نتنفس من كمية الأكل، بس المتاح عندهم وقتها فى الحلو كان تشيز كيك وبراونيز ومولتن كيك، ضايقنا شوية سؤال الجرسون بصفة مستمرة وكثيرة عن "أخبار الأكل إيه" وسط ما بـ ناكل بس التمسنا له العذر لأنهم المطعم الوحيد اللى فاتح فى المكان وما بقالوش كثير.

"كانيرو" مكان لطيف وأكل إيطالى شهي ممكن تجربه لو أنت قريب من توين تاورز، أو لو عندك مواهب فى الغناء ودماغك مزيكا وعاوز تطلق الوحش اللى جوالك.