The Definitive Guide to Living in the Capital , Cairo , Egypt

«كاسبر
& جامبينيز» فاتح وناجح في القاهرة بقاله فترة كافية تمكنه من أن يكون من أفضل
المطاعم وتقديم أفضل خدمات توصيل. أحدث فرع فتح للمطعم كان في مول العرب في مدينة
6 أكتوبر، ومن الواضح أن الفرع هـ يبقى فيه بعض العيوب لغاية ما يوصل لمستواه
المعروف ويقابل توقعاتنا.

أمام محل «داليدريس»، هـ تلاقي ديكور «كاسبر اند
جامبينيز» معمول بالخشب البني الغامق واللبني السماوي، والأرضية غامقة، الكراسي
معمولة من الجلد البني الغامق، والكاونتر لونه أزرق وعليه زجاجات السيرب الملونة ومحطوطة
على الرف اللي فوق. متوفر هناك ركن للمدخنين وركن لعدم التدخين، ونهاية القاعة
معمولة من مربعات من الزجاج بـ تدخل نور الشمس للمكان.

عشان وجبة غذاء خفيفة، طلبنا سلطة خضار وجبنة حلوم (39
جنيه)، سلطة الجمبري التمبورا (21 جنيه)، وسلطة شرائح الفراخ (38 جنيه). قطع الجبن
الحلوم كانت مشوية كويس بس مالحة قوي، الفلفل المشوي كان طعمه مسكر وكان عامل خليط
حلو مع الجبنة الحلوم. الجمبري التمبورا كان برضه ملحه كتير شوية، وده خلانا مش
قادرين نستحمل صوص الصويا اللي عليها كمان عشان بـ يبقى برضه مالح، وكان نفسنا في
أي صوص تاني يكون كريمي ومِزز أكتر.

طلبنا أن سلطة شرائح الفراخ الصغيرة ييجي معاها الفرينش
دريسينج بس من غير ثوم عشان عندنا حساسية من الثوم. وبعد 20 دقيقة، الويتر جاب لنا
طبق جانبي فيه دريسينج مليان الثوم، إضطرينا أننا نشرح له تاني قصة الحساسية من
الثوم. بعد 10 دقائق، جاب لنا طبق فرينش دريسينج عامله الشيف مخصوص لنا، وكان هـ
يبقى أفضل لو كان جالنا قبلها بنصف ساعة مع السلاطة.

للتحلية، كملنا وجبتنا الخفيفة بزبادي مجمد خالي الدسم
(27 جنيه)، إختيار صحي ولذيذ، وجالنا معاه جرانولا المكسرات المقرمشة، صوص توت،
وقطع من الموز والخوخ.

على قد ما بـ نحب «كاسبر اند جامبينيز»، بس لازم نقول أن
الخدمة ماكانتش حلوة. الأوردرات بتاعتنا أخدت وقت طويل على ما نزلت، رغم أن
العاملين هناك كتير والمكان ماكانش زحمة. ولمّا طلبنا شاي بومباي مثلج، جالنا شاي
مثلج بالخوخ، ولمّا طلبنا أنهم يصححوا لنا الأوردر، الكوب فضل 20 دقيقة على
الترابيزة لغاية ما حد من الويترز أخده ووداه لترابيزة تانية. مبدأ أن حد تاني نزل
له الأوردر بتاعنا – رغم أننا لم نلمسه – خلانا نفكر يا ترى الحاجات اللي نزلت لنا
كان إيه نظامها!

ممكن النقد
ده يبقى قاسي شوية لو حطينا في الإعتبار أننا لمّا رُحنا كان الفرع لسّه في أول
أسبوع له، لكن «كاسبر & جامبينيز» له سمعة كويسة من ناحية الجودة والخدمة،
وإحنا نأمل أن الإثنين يتحسنوا في زيارتنا التالية.