The Definitive Guide to Living in the Capital , Cairo , Egypt

لو نفسك تفطر Egg Benedict بصوص الهولانديز، أو تدلع نفسك على الغداء بطبق باستا فراخ بصوص البيستو والصنوبر، في عدد قليل من المطاعم بتقدر تحقق المعادلة الصعبة ما بين تنوع أصناف الأكل وجودته، وكاسبر أند جامبينيز يعتبر من أحسنهم. وطبيعي إنهم لما قرروا يدخلوا السوشي في المنيو نتوقع حاجة مبهرة.

المطعم المشهور اختار فرعه في كايرو فيستيفال سيتي عشان يقدم فيه الأكلة اليابانية المحبوبة، والفرع ده يتميز بأجواء مريحة وديكورات مودرن مع قعدة أوت دور واسعة بتكون زحمة معظم الوقت حتى في الأيام الباردة.

منيو السوشي في كاسبر أند جامبينيز فيها 15 صنف من Uramaki، تبدأ من6 قطع سعرهم 65 جنيه و9 قطع سعرهم 97 جنيه و12 قطعة سعرهم 129 جنيه و18 قطعة سعرهم 183 جنيه.

نبدأ مع البوسطون رول المكون من سالمون وتونة طازة، وده عجبنا فيه كمية الأرز وإن السالمون والتونة كانوا طازة. كان ناقص بس حاجة واحدة، رغم إنها مكتوبة في المنيو وهي الأفوكادو اللي أكيد كان هيضيف طعم لذيذ.

نروح علىAlaskan Roll اللذيذ، وهو خلطة من الكابوريا والسالمون ومقلية ببقسماط بانكو المقرمش، خصوصًا إن السالمون كان طازة والكابوريا روعة. الملاحظة إن اختيار البانكو مكانش في محله وسط المكونات الرائعة.

بعدها وصلنا عند Flying Salmon، المحشي سالمون وقطع كابوريا وجزر، والأخير تحديدًا أضاف طعم مسكر رائع. ننصحكم تجربوا الرول ده ومعاه كمية كبيرة من الواسابي في صوص صويا.

نطلع على قسم المقلي، وطلبنا منه Spicy Crunchy Sake اللي كان نجم اليوم بدون منازع. السالمون المقلي بامتياز وعليه مايونيز سبايسي، وطبعًا البانكو وقطع الكابوريا والجزر زي ما شوفنا في Flying salmon عملوا خلطة سحرية.

قابلتنا مشكلة مع Ebi Roll المقرمش بسبب طعمه الغير متوازن والجبنة البيضاء الزيادة اللي طغت على طعم الجمبري المقلي والبانكو.

كنا متوقعين حاجة مختلفة لما طلبنا C&G Roll، اللي يجمع بين الشريمب تمبورا والبانكو، وعليهم صوص ترياكي بالمايونيز ورقائق واسابي، ونقدر نقول إن طعمه ضعيف بالمقارنة مع باقي الرولات.

أخر حاجة جربناها كانتCrispy Crazy Roll ، والحقيقة إن طعمه كان مش مختلف عن باقي الرولات في وجود الجزر المبشور والكابوريا وطبقة البانكو، ومفيش فيه حاجه تميزه عن الباقيين.

صحيح منيو السوشي في كاسبر أند جامبينيز صغيرة، والنكهات المتنوعة فيها أقل وأقل، لكن أكيد في رولات كانت هايلة والمطعم لازم يتوسع في باقي فروعه لإنها أكيد هتكون إضافة رائعة لسلسلة المطاعم الشهيرة.