The Definitive Guide to Living in the Capital , Cairo , Egypt

لاحظنا في الفترة إن كتير من المطاعم اللي فتحت فروع جديدة مستواها قل بشكل ملحوظ. المشكلة كمان إن الأزمة الاقتصادية في مصر برضه كان لها تأثير وأماكن كتير قررت تستخدم مكونات رخيصة علشان توفر وتقلل الأسعار، وبالتالي أماكن تانية زي إكلير باريس وتشيليز ولورد أوف ذا وينجز وغيرهم عانوا بشكل كبير.

إحنا النهارده هنتكلم عن كاسبر أند جامبينيز فرع ووتر واي اللي محافظ على مكانته كواحد من أحسن سلاسل المطاعم في القاهرة.

المطعم من جوه كبير وأجواءه حلوة وفي نفس الوقت شيك وده واضح من لون الحيطان الرمادي مع الأثاث الخشب والكراسي باللون الأزرق الفاتح. أما بره المطعم فهتلاقي كنب مريح ويعتبر مكان هايل للفطار يوم الجمعة الصبح.

أول حاجة اشتركنا فيها كانت تشيكن كاساديا (74 جنيه) بينزل معاها بطاطس محمرة مقرمشة وثلاثة صوصات: ساور كريم وجواكامولي وصلصة طماطم. الكاساديا نفسها عبارة عن أربع مثلثات تورتيا محمصين ومحشيين قطع فراخ طعمهم حلو مع ميكس جبن وكزبرة أضافت طعم جميل للأكل. الطبق كان كويس بس محتاج حشو أكتر.

تعالوا معانا نروح للأطباق الرئيسية ونجرب كواترو ستاجيوني بيتزا (69 جنيه) وتاندوري تشيكن باستا (83 جنيه). بغض النظر إن البيتزا مش متقطعة أربع أجزاء زي ما إحنا متعودين، بس كان عليها صلصة طماطم لذيذة وخلطة موتزاريلا مع جبنة جودة أضافوا نكهة قوية للأكل، مع خرشوف طازة ومشروم سوتيه وباذنجان وزيتون. إحنا بنعتبر نفسنا روحنا لأماكن كتير متخصصة في بيتزا نابولي، وبصراحة كاسبر مش أقل منهم. عجينة البيتزا كانت روعة وأطرافها منفوخة ومن النص فيها قرمشة خفيفة، وكمية الإضافات اللي عليها كانت محترمة وصلصة الطماطم برضه كانت تحفة.

أما بالنسبة للباستا فكان عليها كلام. يعني مثلًا الباستا مستوية كويس جدًا والفراخ كانت هتنطق من جمال التتبيلة والمانجو المخللة عملت طعم مسكر هايل للطبق. أما الجانب السلبي فصوص الزبادي بالتندوري كان مسكر بزيادة والفراخ كانت ناشفة. الفكرة بصراحة كانت هايلة بس الطبق محتاج شغل عشان يوصل للمستوى المطلوب.

خلصنا أكلتنا بطبق كرانشي بروفيترول (49 جنيه)، وبصراحة طلع حكاية. العجينة كانت خفيفة وفيها قرمشة خفيفة عملت شغل عالي مع حشو كريمة الفانيليا اللي سكرها مضبوط. مسك الختام كان صوص الشوكولاتة اللي بترشه على البروفيترول وبكده يكون عندك طبق حلو محصلش. جايز الكريمة المخفوقة الكتيرة شكلها كان حلو بس هي كانت كتيرة بزيادة.

نقدر نقول إننا قضينا وقت جميل في كاسبر أند جامبينيز. الأكل فعلًا كان حلو والمنيو متنوعة ومناسبة لكل الأذواق، وكمان الخدمة ممتازة والأسعار معقولة. النتيجة اللي طلعنا بيها يومها إن مع كل الظروف والأحداث، كاسبر أند جامبينيز لسه محافظين على مستواهم.