The Definitive Guide to Living in the Capital , Cairo , Egypt

مهما كنا بـ نحب البيتزا أو السوشي أو الناتشوز، الأكل المصري الأصيل هـ يفضل هو بيتنا ومطرحنا، أصل خلينا نكون صرحاء، الموضوع في الجينات يا جماعة أنتم بـ تقولوا إيه! علشان نفسنا راحت على أكلة مصري بيتي، طلعنا على كازوزة في شارع 9 المعادي، اللي بـ يقدم حالة لطيفة من ناحية الأجواء والأكل الشعبي المصري اللذيذ.

بعد ما حصلت المعجزة ولاقينا ركنة قريبة وخلصنا رقصة الاحتفال بالمعجزة دي –والناس في العربية جنبنا بصوا علينا باستغراب مش فاهمين ليه– قابلنا جرسون لطيف رحب بنا في القعدة الأوت دور، وقعدنا على كراسي جنب عدد من المراوح اللي هونت علينا حر الجو.

كازوزة بقعدة تشبه القهاوي البلدي وديكورات مصرية مع لمسات من أيام زمان تشمل ترابيزات قهوة مدورة، رشاشات ملح وفلفل قديمة الشكل، وصور قديمة مع زجاجات قديمة لمشروبات غازية، من الآخر كل الحاجات اللي كنا بـ نشوفها في بيت جدتنا.

بعد ما اتفرجنا على المنيو جاء لنا إحباط، والسبب أن حاجات كثيرة مش موجودة أو لسه هـ تنزل في منيو كازوزة الجديدة.

بعد مباحثات مطولة، قررنا نطلب مقبلات عبارة عن شوية بطاطس (8 جنيه) وسمبوسك جبنة (14 جنيه)، ووصلت على طول وكانت ساخنة ولذيذة.

بالنسبة للبطاطس كانت ذهبية ومقرمشة، أما الأربع قطع سمبوسك كان فيهم جبنة تكفي كل أحلامنا، وكمان مقرمشة من بره والجبن السائح الطري من جوه مخلوط بنعناع طازج.

بعد طول انتظار وصلنا للفطير، وهو الطبق المميز عند كازوزة واللي بـ يُقدم على لوح خشب؛ طلبنا فطيرة ميكس لحوم (50 جنيه) عبارة عن سوسيس، لحم مفروم وسلامي ومعاهم خضروات وجبنة. طلبنا كمان ساندويتش كفتة (12 جنيه) بـ يُقدم في عيش فينو.

نتكلم عن الطعم، الفطير والحق يُقال من أحسن الفطير اللي جربناه في حياتنا، والسبب هو خفة الفطيرة، والمكونات الطازجة والتركيبة السحرية بين الجبنة واللحوم والخضروات. من ناحية الحجم، الفطيرة كانت صغيرة شوية. ساندويتش الكفتة كمان كان هائل، مضبوط بالطماطم والطحينة، واللحمة مش مزيتة والتتبيلة رائعة.

بعد ما خلصنا حفلة الفطير والكفتة –وبعد ما مسحنا الأطباق بمساعدة عصير الليمون والكركدية (11 جنيه للواحد) – جاء وقت الحلو، الفكرة أن كثير من الحاجات في المنيو ومنها الأرز باللبن والكريم كراميل كانت مش موجودة وقت زيارتنا.

في الآخر طلبنا فطيرة بالكريمة والكسترد (31 جنيه)، الشئ الأكيد أن حظنا الحلو كان سبب اختيارنا للفطيرة دي تحديدًا، علشان مع أول قضمة نسينا مشكلة أطباق الحلو اللي مش موجودة؛ الفطيرة كانت مليانة على آخرها بكريمة طازجة رائعة وعليها جوز هند وقدرت فعلاً تعوض الحاجات اللي كان نفسنا نطلبها.

تقييمنا لكازوزة عمومًا له وعليه؛ من ناحية الأكل والخدمة فكانوا ولا أروع، وفكرة الديكورات والفوانيس مبتكرة، أما على الناحية الثانية فكميات الأكل الصغيرة وأن مافيش حاجات كثيرة في المنيو كانت محبطة.