The Definitive Guide to Living in the Capital , Cairo , Egypt

الحقيقة أن دي أكثر صفحة فيسبوك شفناها وهى اللى جرت رجلنا أننا نروح المكان، كابيتال جريل – Capital Grill اللى بدأ فى التجمع الخامس فتح فرع جديد فى توين تاورز فى الشيخ زايد، من قبلها وإحنا معاهم على التليفون ومتابعين هيفتحوا رسميًا إمتى بفارغ الصبر، ده غير أن الموقع الإلكترونى بتاعهم لا يقل حلاوة عن صفحة الفيسبوك.

توين تاورز تجمع مطاعم وكافيهات جديد لسه بيفتح فيه أماكن جديدة، اللى شغال بس دلوقت مطعم كانيرو – Cannero اللى رحناه وكتبنا عنه مقال نقدي، وكمان تي بي إس – TBS، أول ما وصلنا رحبوا بنا وجات المنيو على طول اللى نقدر نقول بكل ثقة أنها مختلفة فى كل حاجة: الصور، نوع الأطباق، وتنوعها، اختارنا شوربة عدس (14.99 جنيه) ومن المقبلات ماك أند تشيز بولز Mac & Cheese Balls بـ (29.99 جنيه)، بعدها رحنا على الأطباق الرئيسية واختارنا رول فراخ محشي سبانخ (64.99 جنيه) وبيتزا بيف فيليه (89.99 جنيه)، وبينزل مع الأطباق الرئيسية اختيارين وكانوا خضار سوتيه وبطاطس بيوريه.

بعد ما طلبنا نزل لنا سلة عيش معاها صوص شميشورى Chimichurri والمكون من كزبرة وشبت وخل وثوم بودرة على حسب وصف الجرسون (بس مش دي مكونات الوصفة الأصلية اللى نعرفها للصوص)، طعمه كان لاذع أوى تحس فيه ليمون بس كان لطيف، العيش كان فريش وطرى وطعمه حلو، نزل لنا بعدها الشوربة، قوامها كان حلو جدًا بالنسبة لشوربة عدس عادة بتكون ثقيلة وكميتها كمان كويسة، ومعاها بيقدم ليمون ومكعبات عيش محمصة.    

بعدها جاء لنا الماك أند تشيز بولز ودي عبارة عن 4 كرات مقلية جواها مكرونة معمولة بطريقة الماك أند تشيز، الحقيقة إحنا ما حسيناش خالص بطعم المكرونة لأن الكرات كان حجمهم صغير أوى بس كان طعمها لطيف، ما كناش نتخيل يكون حجمها صغير أوى كده، أول ما نزلت الأطباق الرئيسية روحنا اتخطفت، طريقة تقديم الأكل محترفة وفيها فن، تفتح نفس أى حد مش جعان، كميات الأكل خرافية لدرجة أننا فطسنا فى نهاية زيارتنا.

أول طبق كان الفراخ المحشية بالسبانخ وعليها كمان صوص سبانخ بالكريمة، الفراخ كانت مقطعة حلقات فواضح شكل السبانخ جواها وطعمها يجنن، كل المكونات فريش والصوص كان خطير، البطاطس البيوريه كانت كريمي وبينزل معاها صوص بنى والسوتيه مضبوط تسويته زي ما قال الكتاب، ولا بيقرمش ولا مهرى من التسوية.

ثاني طبق البيتزا بيف فيليه، دي أول مرة نجربه، اللى جربناه قبل كده وعارفينه هو التشيكن بيتزا، بتبقى قطعة فراخ عليها مكونات وصلصة البيتزا، لكن عاوزين نقول لكم أنها اختراع مع البيف، قطعة البيف لوحدها كان طعمها حلو جدًا، تسويتها ممتازة، طرية ومش بتشد، وطعم اللحمة نفسها ممتاز، واللى أضاف لطعمها مكونات البيتزا مع الصلصة اللى كونت معاها مزيج رائع.

زي ما قلنا لكم قبل كده بعد الأكل ما كناش قادرين نتنفس، انتظرنا شوية كتير وبعدها طلبنا من الكوكتيلات Hawaiian Island بـ (19.99 جنيه) وده عبارة عن برتقال وأناناس ويوسفى عليهم 7UP ومن الحلويات شدنا الـ Fried Ice Cream بـ (21.99 جنيه)، الطلب ما أخذش وقت كثير، الهاواين أيلاند كان منعش جدًا بعد أكلة فخيمة والميكس ما بين المكونات كان مثالى، اللى أحبطنا شوية الفرايد آيس كريم، لأن الطبقة الخارجية اللى حول الآيس كريم كانت سميكة جدًا فكنا حاسين أننا بناكل عجينة أكتر ما بناكل الآيس كريم نفسه، بس عامة طعمها كان لطيف، واللى ألطف بقى أن الجرسون قال لنا أنهم هيقدموها لنا مجانًا بمناسبة الافتتاح.. وبالتالى نجحوا أنهم يرسموا ابتسامة على وشنا فى آخر زيارتنا.

"كابيتال جريل" مكان ممكن تروحه لو عاوز تعزم أصحابك على أكلة فخيمة وكمياتها كبيرة وضامن جودتها وكمان متنوعة ومختلفة، وغير كده تستمتع بقعدة حلوة فى المكان المفتوح أو بالديكورات الشيك فى المنطقة المقفولة.