The Definitive Guide to Living in the Capital , Cairo , Egypt

القعدة في الزمالك لها دائمًا طعم تاني، يمكن علشان الزمالك نفسها بشوارعها ومحلاتها مميزة وفيها روح مختلفة عن باقي الأماكن في القاهرة، وعلشان الخروجة بتحلو لما بتكون مع أصحابنا أو مع الأسرة، قررنا نطلع على مطعم وكافيه “قعدة عربي” الزمالك، واللي هنعرفكم في الموضوع ده على تفاصيل تجربتنا معاه.

مطعم “قعدة عربي” معظمه مفروش بكنب عربي هيخليك تحس بالراحة، لكن المكان فيه برضه ترابيزات وكراسي عادية، وكمان فيه قعدة خارجية في الهواء الطلق، بننصح بيها في الوقت المشمس أو الربيعي، وخلينا كمان ماننساش أن التيم اللي شغال هناك مميز جدًا وتعاملهم كله احترافية ومحبة خلتنا حبينا المكان.

قررنا نبدأ الموضوع بتجربة شوربة فراخ بالكريمة وكان سعرها 40 جنيه، والكريمة كانت لباني مش دقيق، والفراخ كانت مستوية كويسة وطعمها حلو، وقطع المشروم كانت مزودة الطعم حلاوة، ومن النادر أننا نعجب بطبق شوربة لدرجة اننا نخلصه كله قبل الطبق الرئيسي.

كمان جربنا ميكس جريل بسعر 193 جنيه، وكان عبارة عن قطعتين لحمة متسويين كويس، وتتبيلتهم هادية كده من اللي تحسوها بتقولكم أنا لازم أتاكل، مع قطعتين شيش طاووق من اللي قلبك يحبهم، وكمان كان في الطبق قطعتين كفته لكن للأسف ماكنتش أحسن حاجة، ونتمنى المرة الجاية تكون أفضل.

بصفة عامة الطبق كان كويس، رغم إن طريقة التقديم بتاعته ماكانتش أحسن حاجة، ولأن العين بتاكل عند غالبية الناس، فبننصحهم يهتموا بالشكل النهائي للطبق لأنها ممكن تكون سبب لعدم رضاء العملاء.

نقدر نقول إن تجربتنا بشكل عام كانت مميزة، رغم إننا اتضايقنا من إن المكان زحمة بالترابيزات والكنب، ومافيهوش خصوصية لأنكم هتكونوا قاعدين جنب بعض لو عاوزين تقعدوا على الكنب، أما لو هتقعدوا على الكراسي العادية فنوعًا ما هتحسوا بالخصوصية لأن الأغلبية بتفضل القعدة العربي.

وعلشان تعرفوا أكتر عنهم زوروا صفحتهم على الفيسبوك من هنا.