The Definitive Guide to Living in the Capital , Cairo , Egypt

فيو على النيل، أكلة حلوة ومشروبات مقبولة، وقعدة مريحة! لو اللي فات ده اتجمع في مكان واحد يبقى معادلة الانبساط اكتملت، ويبقى كده أنتم كسبتم كل حاجة في خروجة مميزة، وده اللي بيقدمه Volo’s Cafe المنيل، واللي لسه فاتح من فترة قريبة داخل نادي الإعلاميين، وإحنا جربناه 3 مرات قبل ما نكتب الريفيو ده عنه. لكن لحظة من فضلك! الحقيقة أن الحلو ساعات مابيكملش، ورغم إننا انبسطنا في Volo’s Cafe لكن عندهم أخطاء لازم يخلوا بالهم منها قبل ما تكبر وتبقى مشاكل.

في السطور الجاية هنقول لكم على تفاصيل تجربتنا وكل اللي محتاجين تعرفوه عن Volo’s Cafe.

Volo’s Cafe هو كافيه ومطعم إيطالي حسب اليافطة بتاعته، وهو موجود في نادي الإعلاميين النهري في عبد العزيز آل سعود، والفيو بتاعه على النيل على طول، وفيه قعدات لطيفة وكراسي مريحة وكمان مراجيح فردية وكنب مرجيحة. والمكان بصراحة متكامل في الجزء ده، ولكن الخدمة للأسف ماكنتش أحسن حاجة لأسباب كتير، أولًا زي ما قلنا إحنا جربناه 3 مرات بسبب إنهم كانوا لسه فاتحين، ولاحظنا إنهم في أيام المباريات المهمة بيفرضوا 100 جنيه حد أدنى للطلبات، ودي حاجة ضايقتنا.

أما عن تجربتنا في الأكل فطلبنا بيف فيليه وكان معاه أرز وماش بوتاتو، وسعره 220 جنيه، وده كان اختيار موفق وطعم اللحمة وتسويتها كان عظيم، والماش بوتاتو “بطاطس مهروسة” كمان كان حلو، لكن الأرز ماكنش أحسن حاجة ولكنه مقبول بس يتسوى أكتر شوية، وطلبنا طبق جمبري كمقبلات للأكل ولكن مجتش للأسف وبدون سبب!

كمان جربنا من عندهم ساندوتش جمبري سعره 95 جنيه، وهو كان معمول حلو جدًا وطعمه لطيف والعيش كان متحمر على الجريل فمدي طعم مميز جدًا، والسيرفيس بتاعم كان كويس.

أما المشروبات فللأسف إحنا طلبنا 4 قهوة سعر الواحدة 28 جنيه، مافيش منهم غير واحدة بس اللي جت كويسة والباقي مكنش لطيف وبلغناهم ولكن لا حياة لمن تنادي ومافكروش حتى يعرفوا ايه المشكلة، وكمان جربنا مولتن كيك وسعرها 45 جنيه، ودي كانت أسوأ حاجة في المنيو.

تجربتنا بشكل عام كانت إيجابية لو هنتكلم عن الفيو والأكل، لكنها كانت سلبية من حيث الخدمة وبعض المشروبات والحلو.

بنتمنى الفترة الجاية تكون أفضل وأقوى في Volo’s Cafe ويقدروا يظبطوا الدنيا كويس، علشان التجربة تبقى متكاملة ومبهجة.

تقدروا تعرفوا أكتر عنهم من خلال صفحة الفيسبوك من هنا.