The Definitive Guide to Living in the Capital , Cairo , Egypt

بسرعة
بقى واحد من أهم الشوارع التجارية المليانة بالمطاعم والمحلات في القاهرة، شارع
أبو الفدا بـ يفتح فيه محلات جديدة كل يوم.

محلات
زي «لينوزLino’s – » و«جريزليGrizzly – » و«عبد الوهابAbdel
Wahab – ». وآخرها
كان مطعم سوشي جديد اسمه «فويجو – Fuego» اللي فرعه الأصلي كان في المعادي، وكان بـ يتردد عليه كل محبي
السوشي بكثافة.

كلمة
“فويجو” معناها “نار” باللغة الأسبانية، وهو اسم غريب على محل
أصلًا بـ يقدم أكل مش بـ يستوي على النار ولا حتى بـ يقدم أكل له علاقة بأسبانيا! لكن
مع منيو “كل اللي تقدر تأكله” اللي هم عاملينه وعجبنا جدًا ممكن نسامح
في موضوع الاسم ده. النظام في «فويجو» كالتالي؛ يوم الاثنين والثلاثاء فيه زي
بوفيه مفتوح للسوشي بـ 135 جنيه وباقي الأسبوع بـ يبقى بـ 150 جنيه. الحاجتين اللي
مش موجودين في البوفيه المفتوح هما السكالوب والستاكوزا.

ديكور
المحل من الداخل نقدر نقول عليه آسيوي حديث ومطعم بعناصر طبيعية زي الأخشاب
والحجارة. الترابيزات تكفي 4 أشخاص بحد أقصى. المكان مساحته مش كبيرة لكن علشان
الترابيزات مقسمة زي الأكشاك بعيد عن بعضها فهـ تحس أن المساحة معقولة، ومشكلة
الديكور عمومًا أن الإضاءة خافتة جدًا وبصعوبة هـ تقدر تقرأ المنيو.

اخترنا
المنيو أو البوفيه المفتوح “All you can eat” وأخذنا معاه
سلاطة الواكامي (30 جنيه) كمشهيات. لما تطلب المنيو ده الجرسون هـ يسألك لو بـ
تفضل أنواع معينة من السوشي، أو لو فيه أنواع مش عاوز تشوفها في طبقك. سلاطة
الواكامي كانت مخيبة للآمال وكانت غرقانة في أعشاب البحر، وكان فيها مكونات
تقليدية عادية زي الخيار، لكن عجبنا أن كان فيها كمان قطع أفوكادو.

وزي
ما طلبنا جاء لنا 30 قطعة سوشي لكل واحد وما كانش فيه وحدات “نجيري”
كثير لكن كان فيه وحدات كثير من “كاليفورنيا رولز” و”هوسو
ماكي” “أورا ماكي” ودي للي مش عارف أسماء “موديلات”
معينة من السوشي بحشو وطريقة لف مختلفة. السوشي كله كان طعمه فريش جدًا وما عجبناش
بس القطع اللي بالخضار وكان باين فيها طعم الخس. وأكثر القطع اللي عجبتنا كان
اسمها “كامي كازي” ودي فيها سمك السلمون والأفوكادو وقطع الجمبري، وقطع
الـ “دراجون رول” بسمك الثعابين والخيار والأفوكادو.

في
الحلويات طلبنا الموز المحمر (20 جنيه) المعمول بالفانيليا والآيس كريم، وده كان
جميل في طعمه لكن غريب في شكله وطريقة تقديمه. الخدمة جيدة والعاملين متعاونين،
وكل ما يقدموا طبق من السوشي لازم يشرحوا لك بالضبط ده اسمه إيه وعبارة عن إيه
علشان تبقى عارف أنت بـ تأكل إيه. «فويجو» اختيار جديد وظريف للسوشي في الزمالك.