The Definitive Guide to Living in the Capital , Cairo , Egypt

فكرة الأكل الراقي لو في مكان غير الفنادق فيها سوء تفاهم كبير-المشكلة ببساطة إنهم فاكرين الأكلة الراقية معناها تقديم أكل غالي بكميات قليلة. الفكرة إن في كام مطعم قربوا جدًا من تقديم الأكل الراقي على أصوله ومنهم “فلامبى-Flambé”.

فلامبى موجود على شارع عمر بن الخطاب هليوبوليس ويتميز بأجواءه الفخمة اللي تخليه من أحسن الأماكن لخروجة رومانسية جميلة. نوصف المكان شوية ونبدأ مع منطقة الأكل الموجودة جنب البار الكبير الرائع والمطبخ المكشوف. لو عايزين قعدة كاجوال شوية فلامبى عنده كراسي عالية جنب التراس هايلة لو عايز تتمزج بمشروبك المفضل مع أصحابك.

بدأنا مع سموكد دك رولز (50 جنيه) نفتح بيه شهيتنا، عبارة عن رولات محشية بط مدخن بالزنجبيل مع سويت تاي شيلي صوص.بغض النظر إنه نزل متأخر مع الأطباق الرئيسية، ماكانش فيه أي طعم مميز للبط، والرولات كانت تخينة جدًا رغم إن جمالها بيكون في الرقاق الخفيف، وكمان السويت تاي شيلي لا كان سويت ولا تاي ولا شيلي، وكان أقرب لساور صوص.

ننسى المقبلات ونروح للأطباق الرئيسية ونبدأ مع مشروم ريزوتو (90 جنيه)، والحقيقة إن الريزوتو كان كريمي ولذيذ وتتبيلته روعة، وكمان معمول آل دينتي زي الكتاب ما بيقولمع شوية زيت كمأة وكمية مشروم أبيض وشيتاكي محترمة، والتركيبة دي كانت ماشية زي الفل وعملت طعم تحفة. لازم كمان تعرفوا إن الريزوتو عليه جبنة granapadano  وبكده نقدر نقول لكم إن الطبق ده فيه توازن رهيب بين مكوناته وأكيد عوضنا عن طبق المقبلات الضعيف.

الطبق التاني كان بيف فيليه جراتان (185جنيه) وكان على وضعه هو كمان. يمكن المرقة كانت خفيفة شوية –والغريب إنها بتتقدم في كاس صغير– بس قطعة الفيليه كانت مستوية medium كويس جدًا وعليها مشروم جراتان بالجبنة تحفة ومعاها هليون مسلوق على نار هادية وبطاطس تحفة، وفعلًا عملوا أداء عالي مع الأكل.

مسك الختام كان مع الحلو، والحلو كان وايت شوكليت ماسكربون (75 جنيه). بصراحة وصف الطبق في المنيو خلانا مش ماسكين نفسنا، وكفاية لما تعرف إنه ماسكربون شوكولاتة بيضاء مع بودرة شوكولاتة داكنة مكرمل وقشر برتقال مسكّر، بس الحقيقة كانت صدمة. البرتقال المسكر طلع مربى برتقال، والأسوأ كمان إن طعمهه طغى على طبقة الماسكربون الرقيقة والشوكولاتة الداكنة، فالموضوع كان قريب من بودينج شوكولاتة.

في أخر اليوم كنا محتارين شوية، يعني أجواء فلامبى وأطباقه الجميلة كانوا هايلين، بس الخدمة كانت في منتهى السوء (لدرجة إننا طلبنا حاجات أكتر من مرة) وفي أطباق كانت تعبانة جدًا – اللي هما طبق المقبلات والحلو. هنروح تاني؟ أيوه، بس يا ريت يعالجوا المشاكل.