The Definitive Guide to Living in the Capital , Cairo , Egypt

كتير مننا بيدور على أكل مميز وطعم بيتي، واللي مش موجود في كل المطاعم، ورغم تخوفنا من تجربة حاجة جديدة في الفترة اللي فاتت إلا أننا اتشجعنا وقررنا نجرب مطعم فطومة اللي بيقدم أكل بيتي على أصوله، واللي كل يوم عندهم منيو مختلف، ولازم تحجزوا أكلكم من خلال صفحتهم على الفيسبوك أو من خلال رقم التليفون، علشان هما بيعملوا أكل بيتي على القد مش بكميات كبيرة، وبننصحكم تجربوه في أقرب وقت لإنكم هتنبسطوا هناك، وخلال السطور الجاية هنقولكم على تفاصيل تجربتنا في مطعم فطومة.

المكان بسيط جدًا، واللي بيطبخ سيدة عظيمة وبنتها، يعني أكل بيتي بيتعمل بحب وبنفس ست البيت، وهما ماعندهمش ديكورات مبهرة، مجرد ترابيزات للأكل ومطبخ بيتعمل فيه الأكل، ولكن بيقدموا أكل ممتاز من حيث الجودة والخدمة، وعندهم ميزة مهمة وهي إنهم دايمًا بيقابلوكم بابتسامة جميلة، وكمان بيعملوا عزائم وبيوصلوا لكل مكان في القاهرة.

جربنا عند فطومة طاجن لحمة بالبصل وسعره 90 جنيه، واللي فيه 3 قطع لحمة مستويين صح في طاجن فخار ومعاه بصل وقطع جزر وتتبيلة عظيمة مخلية الصوص ممتاز.

كمان جربنا عندهم أرانب مع طاجن الملوخية، وسعره 150 جنيه، وكان عبارة عن 1/2 أرنب طعمه عظيم جدًا، رغم تخوفنا من أننا نجربه في البدايةن ولكن بننصح كل الناس أنها تجربه، مع طاجن ملوخية معمول بشوربة الأرانب كانت عظيمة ومش هتحسوا بفرق في الطعم عن ملوخية البيت.

وجربنا عندهم فراخ بانيه مع الأرز بسعر 70 جنيه، واللي كانت جميلة جدًا ومتتبلة حلو خالص وكانوا 3 قطع فراخ تشبع أي حد، والأرز بيتي زي ما قال الكتاب.

المكان رغم أنه صغير إلا أنه بيقدم تجربة مميزة في الأكل، ومش هتبطلوا تطلبوا منهم، وماتنسوش الحجز بعد ما تشوفوا المنيو بتاعهم اليومي على صفحتهم على الفيسبوك من هنا.