The Definitive Guide to Living in the Capital , Cairo , Egypt

وجبة الإفطار من الأساسيات اللي بنحتاجها يوميًا لفوائدها الكتير، ودايمًا بنبقى عاوزين نغيّر، وبييجي علينا وقت بنكون محتاجين التغيير ده يكون في نوعية الأكل، الفيو، الروح، وكل حاجة! علشان كده، النهاردة قررنا نحكي لكم عن تجربتنا المميزة مع الفطار الفرنسي في Ladurée Egypt، اللي موجود في قلب منطقة الأهرامات بالجيزة.

بدأنا يومنا بوصولنا لمنطقة الأهرامات، واللي كانت زحمة جدًا بالمناسبة، والدخول أخد وقت من البوابة لكشك التذاكر. وده كان شيء مفرح، ونتمنى إنه يدوم دايمًا! عند شباك التذاكر، كانت الزحمة كبيرة، لكن لحسن الحظ كان فيه ماكينات تذاكر إلكترونية في الجنب، قررنا نستخدمها، والدفع فيها بيكون بالفيزا، فده كان أسهل وأسرع بكتير.

أما Ladurée Egypt، فديكوراته المميزة والمريحة بطابعها الفرنسي الكلاسيكي خطفت أنظارنا من أول لحظة. لكن الأجمل من الديكور، كان فريق العمل، اللي بجد من أفضل الشباب اللي تعاملنا معاهم في المطاعم! مبتسمين، خدومين، ومتواجدين دايمًا لأي استفسار، ولو مش عارفين الإجابة، ببساطة بيقولوا “مش متأكد” وبيجيبوا حد متخصص يجاوب، مش بيفتوا ولا بيقولوا “هو قالك فين؟!”

طلبنا بوكس برنش من عندهم، كان سعره 1235 جنيه ويكفي فردين. البوكس كان فيه 3 قطع عيش مع زبدة، عسل، ومربى، وبيض مسلوق على طريقة البنديكت، وكمان شريحتين توست فرنسي مع كريم شانتيه ومربى، وسلطة فواكه مع قطعتين ماكرون، و2 عصير برتقال ومشروبين سخنين. الوجبة دي ممكن تختاروا منها حاجات مختلفة تانية من المنيو، بس ده اللي إحنا قررنا نجربه، وبصراحة كانت وجبة مشبعة جدًا لفردين، ومعمولة بحب، وعجبتنا بشكل مبهر!

كمان جربنا من عندهم الكرواسون الفرنسي ورغم أن الاختيارات كانت محدودة في وقت التجربة إلا أننا اخترنا زعتر وكان سعره 138 جنيه، وكرواسون ورد بـ139 جنيه، وسادة بسعر 126 جنيه وأخيرًا شيكولاتة بـ138 جنيه، طبعًا الطعم كويس بالنسبة لتجربتنا، وكرواسون الورد لو عارفين مشروب “الشربات” بتاع زمان كان شبيه له، أما بقى كمية الشيكولاتة في الكرواسون الحلو كانت قليلة ولكن عظيمة فوق الوصف ومن الممكن تكون الكمية القليلة دي الصح للريسبي علشان الطعم يكون مظبوط.

وأخيرًا طلبنا من عندهم ladurée Omelet وكان عبارة عن رول بيض مخفوق بالخضروات والرومي المدخن والأعشاب والمشروم وطعمه حكاية وبنرشحه 100%.

تقدروا تعرفوا أكتر عنهم من خلال صفحة الفيسبوك من هنا.