The Definitive Guide to Living in the Capital , Cairo , Egypt

كتير مننا بيدور على أحسن أماكن بتقدم أكلة حمام، ويا ريت لو بمواصفات بيتي، لأن الحمام من الأكلات اللي لازم تكون نضيفة ومميزة في المطعم اللي بيقدمها، والقاهرة فيها أماكن عظيمة بتقدم أكلات الحمام المختلفة، على رأسها طبعًا كبابجي الأزهر الشهير بـ”فرحات”، واللي حاليًا عنده أكتر من فرع في القاهرة.

في الريفيو ده هنعرفكم على تفاصيل تجربتنا مع فرع فرحات الجديد في المهندسين.. جاهزين يا أكيلة القاهرة؟

المكان خليط من الطابع الشعبي وحي الجمالية والطراز المعماري العربي القديم، وفيه كراسي وترابيزات خشب كبيرة، ورغم أن المكان واجهته عظيمة وترخيصه سياحي، ولكن أول حاجة لاحظناها إن فريق العمل مش بروفيشنال بالقدر الكافي، ومش مدرك قيمة المكان ومكانته التاريخية في القاهرة.

ندخل على طول على الأكل.. بدأنا تجربتنا بشوربة لسان عصفور، سعرها 12 جنيه، وكان طبق حلو ومعمول زي ما قال الكتاب، وشوربة الحمام اللي نزلت لنا في مج، سعرها 8 جنيه، وللأسف كانت خفيفة وخيبت توقعاتنا، وكمان ماكنش فيها بهاريز الحمام زي أي مكان متخصص حمام وبيقدم الشوربة بتاعته.

طلبنا كمان طاجن ورق عنب واللي نزل في طاجن فخار ومرصوص بشكل حلو، أما الطعم فخلينا نغني فيه ونقول “ياروحي عليه”، من جماله وحلاوته.

وطلبنا  2 فرد حمام محشي أرز لأنه للأسف مافيش فريك، وكان سعر الفرد الواحد 88.5 جنيه، وطبعًا كان اختيار هايل إننا نختار فرحات في تجربة الحمام سواء بسبب الجودة بتاعة الحمام أو بسبب التتبيلة وحتى التسوية، حظنا حلو أننا أكلنا من عنده الأكلة الحلوة دي.

كمان جربنا من عندهم فتة أوزي وسعرها 241 جنيه، وفتة موزة سعرها 231 جنيه، وتحسهم منقيين حتة اللحمة مخصوص وشاويينها بحب علشان كده الطعم طالع أجمل وأحلى مما تتخيلوا، والتسبيكة كانت صح، وخلينا نقول أن الكمية دي تكفي فردين مش فرد واحد.

لكن عندنا ملاحظة نتمنى يحلوها، أنهم بيجيبوا الفتة في طبق والأكل في طبق تاني، وده ضايقنا لأننا متعودين لما نطلب فتة انها تكون جواها أو عليها الأكلة اللي بنطلبها، ونتمنى يكون فيه تغيير في طريقة التقديم المرة الجاية.

رغم إن اختياراتنا كانت محدودة من المنيو اللي كان مليان حاجات كتير، إلا إننا مبسوطين بتجربتنا في فرحات المهندسين جدًا، واستمتعنا بالأكل بجد! وخلينا نأكد لكم أننا قعدنا 24 ساعة مش قادرين ناكل من حلاوة وطعامة ودسامة الأكل.

تقدروا تعرفوا أكتر عن كبابجي الأزهر “فرحات” من خلال صفحة الفيسبوك من هنا.

ولطلب الدليفري الاتصال على رقم 16102.