The Definitive Guide to Living in the Capital , Cairo , Egypt

بـ نحب «فدركرز» جدًا، خاصة فرع المعادي في شارع 263 الهادئ جدًا القريب
من مبنى القمر الصناعي. حبنا لسلسلة المطاعم الأمريكية نابع من أكثر من تجربة
رائعة في كل فرع من الفروع الموجودة في سيتي ستارز والدقي وفرع المعادي المفضل
بالنسبة لنا. برجر معمول من أجود أنواع اللحم اللي جاي من مزارع خاصة في الولايات
المتحدة والمذبوح بطريقة حلال وهم موضحين ده في المنيو أكثر من مرة، ونفس الكلام
بالنسبة للخضروات وتوابل فدركرز الخاصة اللي هـ تحس أنها بصمة مميزة للمكان هـ
تخليك تدمن البرجر والستيك والدجاج من عندهم.

المكان واسع ورحب وفيه قعدات كثير تناسب كل أنواع الزوار، سواء شلة أصحاب كبيرة
أو عائلات أو قعدة رومانسية لـ 2 مخطوبين أو حتى لو واحد عاوز وجبة سريعة
على طريقة المطاعم الأمريكية بقعدات الـ American Dinner الشهيرة. هـ تحس في كل الحالات أنك الزبون المناسب في
المكان المناسب. الديكور المميز وموسيقى الروك والكانتري وصور المأكولات الأمريكية
والمكسيكية حولك هـ تفصلك تمامًا عن العالم الخارجي، وهـ تعيش تجربة فريدة بكل
تفاصيلها.

المنيو ضخم جدًا وفيه البرجر هو الملك. بـ يُباع حسب الوزن بالجرام، 3/1
باوند أو 2/1 باوند أو 3/2 باوند، الباوند هو الرطل وهو مقياش مش مستخدم قوي في
مصر والرطل تقريبًا يساوي 2/1 كيلو. البرجر بـ يُقدم بأشكال عديدة أشهرها
التامبلويد بالفلفل المشوي وذا ووركس وساوث ويست وهوت روكس وبرجر الخضروات
للنباتيين. كل نوع من الأنواع دي له إضافات خاصة من البصل أو الفلفل أو المشروم أو
بيكون البيف أو الجبنة السويسرية السايحة، وبأسعار بـ تتراوح بين 40 لـ 55 جنيه
حسب الحجم. واللحم بـ يُقدم صافي بدون ملح علشان تظبطه أنت حسب رغبتك وبـ يبقى
العيش الكايزر مفتوح علشان لو حابب تضيف جبن أو مايونيز من الماكينة الموجودة في
وسط المطعم، والأهم من ده أنك لما تأكل داخل المحل بـ يبقى لك بجانب الطلب بتاعك
بار السلاطات مفتوح ممكن تزوره أي عدد من المرات. والبيبسي كمان ممكن تعمل إعادة
تعبئة أي عدد من المرات (15 جنيه) الظريف في «فدركرز» هو أنك ممكن تخدم نفسك بنفسك
وتعيد ملأ سلاطاتك ومشروبك وجبن الهالبينو والشيدر كأنك في بيتك.

طلبنا طبق مقبلات فدركرز (58 جنيه) فيه أصابع موتزاريلا وحلقات بصل مقرمشة
وبطاطس بالجبن واللحم المفروم وأجنحة الدجاج ولفائف الكاسيديا المحشوة وخيار وجزر
مع مسطردة العسل وكريمة الرانش اللي من غير ملح. الطبق ده وجبة لوحده، ممتع جدًا
وهـ تحب كل صنف فيه وهـ تفكر تطلبه بشكل مستقل الزيارة القادمة. من منيو مختارات «فدركرز»
المميزة اللي فيه أطباق الستيك طلبنا منه “بون إن ستريبلون” (121 جنيه)
وده عبارة عن قطعة لحم بوزن 170 جرام فيها العظم بتاعها وبـ يكون نصفها فيليه
ونصفها ستيك وبـ يتم تسوية أي لحوم حسب رغبتك، يعني Well Done ولاHalf Done ولا تبقى بـ تشد قوي.
لازم تحدد بدقة درجة الشواء على الجريل. مع البطاطس المهروسة والسوتيه الفريش
متعتنا كان مالهاش حدود. طبعًا الستيك هنا غير عادي، ولو نفسك في وجبة تفضل
تفتكرها أيام بعد كده وتعد الأيام علشان تروح تأخذها ثاني يبقى جرب “ريب آي
ستيك” بالجمبري (85 جنيه).  

برجر كاوبوي بحلقات البصل بالخل البلسمي والخس والمايونيز وصوص الباربيكيو
(45 جنيه) نقدر نعتبره ساندويتش مثالي وهـ يوصل لك البصمة المميزة للسلسلة
الشهيرة، بدون أي اضافات غير مألوفة.

السلاطات فريش والجبنة السايحة تجنن، والخدمة سريعة والعاملين مهذبين جدًا،
قابلتنا بس مشكلة صغيرة وقت ما طلبنا الشيك لكن تم حلها بسرعة بعد ما جاء لنا المتر
الكبير واعتذر لنا عن الخطأ.

«فدركرز» هـ يفضل مكاننا المفضل لما يبقى نفسنا في أكلة برجر لحم أو دجاج
معتبرة، وبـ نتمنى نشوف له فروع أكثر في القاهرة الجديدة والزمالك. بـ نرشحه لقراءنا
بشدة.