The Definitive Guide to Living in the Capital , Cairo , Egypt

“مين اللي ما يحبش فاطمة”.. مسلسل قديم كنا كلنا بنتفرج عليه وبنحبه، لكن المقولة دي تنطبق كمان على مطعم “فاطمة” الموجود في أركان بلازا في الشيخ زايد، رحناه من 3 سنين فاتوا وكتبنا عنه مقال نقدى، وفكرنا نعدي تاني بعد فترة علشان نشوف الأخبار إيه ولسه محافظ على مستواه ولا لأ.

قابلنا الجرسون بترحاب واختارنا نقعد في الـ Outdoor اللي أضواءه كانت خافتة ومهدئة للأعصاب، المنيو تقريبًا زي ما هو مع اختلافات طفيفة، فاطمة كمان عندهم منيو مميز للفطار ممكن تشوفه من على صفحتهم على الفيسبوك ده غير أنهم كل فترة بيعملوا offers للفطار أو في المناسبات.

طلبنا شوربة الحريرة (39.90 جنيه) وسلاطة فتوش (39.90 جنيه)، ومن الأطباق الرئيسية كان وحشنا طبقهم الجامد جدًا الفريك بالبشاميل والفراخ (89.90 جنيه) واللي وافقنا الجرسون أنه من أقوى الأطباق عندهم، وشدنا اسم فتة شاكمبا (99.90 جنيه) ودي عبارة عن فتة باللحم البتلو والصلصة الحمراء فطلبناها.

الأكل أخد وقت شوية، أول حاجة وصلت الشوربة ويليها السلاطة وطبق كبير فيه رغيف عيش أبيض كبير جدًا وسخن عليه سمسم وحبة البركة ريحته لوحدها كانت علامة.. وبعدها بشويتين الأطباق الرئيسية، الشوربة مكونة من حمص وقطع لحم مقطعة صغير وشعيرية في مرقة بصلصة حمراء، رغم أن كان ناقصها بعض مكونات الحريرة الأصلية لكن طعمها حلو وكميتها كبيرة وغنية بالتوابل والطعم، السلاطة ما كانش واضح فيها طعم دبس الرمان المميز المسكر، كان اللي واضح أكتر زيت الزيتون والليمون بس طعمها كان فريش وحلو وحجمها برضه كبير جدًا.

لنا ملاحظة عامة على كمية الأكل أنها كبيرة جدًا، الـ Portion الواحدة تكفي فردين، سواء كانت الشوربة أو الأطباق الرئيسية، نروح بقى على الفريك بالفراخ والبشاميل، الطبق ده من علامات المكان، طعم البشاميل الخفيف مع الفراخ المستوية الدايبة مع البشاميل والفريك وهمى، الطاجن كان حجمه كبير جدًا بس من جماله خلصناه، نفس الحلاوة في فتة شاكمبا، مكونة من طبقة عيش محمص وأرز أبيض عليهم من فوق اللحمة البتلو وصوص أحمر ده غير أن بينزل معاها في بولة صوص أحمر زيادة لو حابب تضيفه، قليل أوي لما تروح مكان وتلاقى اللحمة مستوية بالجمال ده وكمان مافيهاش أي دهون، بجد اللحمة لوحدها قطعة فنية، والصوص الأحمر كان طعمه خفيف ورائع.

بعد ما خلصنا طلبنا عصير تين شوكى (29.90 جنيه) وده ترشيح الجرسون، ومن الحلو اختارنا فولكانو بالآيس كريم Volcano بـ (45.90 جنيه) وده زي المولتن كيك بالضبط وبينزل معاه بولة آيس كريم فانيليا، دى أول مرة في حياتنا نذوق عصير التين، والمفاجأة أنه طلع خفيف ومنعش ورائع، مش عارفين نلاقى وصف دقيق له الصراحة، على عكس الفولكانو كيك اللي كانت دسمة جدًا لأن الشوكولاتة كانت تقيلة وبولة الآيس كريم كانت صغيرة بالنسبة لحجم الكيك، وبالتالى خلص بسرعة وما لاقيناش حاجة تخفف من دسم الكيك الباقى، طعمها حلو بس ممكن تعجب الناس اللي بتحب الشوكولاتة التقيلة.

اتبسطنا في قعدتنا وزيارتنا لمطعم “فاطمة”، الأطباق الرئيسية هما أساتذة فيها لكن لنا تعليق على كميات الأكل زي ما قلنا والأسعار الغالية اللي اختلفت عن زمان بسبب التعويم لكن برضه بالمقارنة بأماكن تانية هى عالية، ده غير أنه فيه كوفر (7.9 جنيه للفرد) والخدمة والضريبة لوحدهم 100 جنيه، بس هتخرج من المكان بطنك مبسوطة.