The Definitive Guide to Living in the Capital , Cairo , Egypt

المطعم حديث نسبيًا، يعنى فاتح من 7 أو 8 شهور، موجود في عمارات الشرق في
الشارع اللي فيه الحديقة الدولية المتفرع من عباس العقاد، جنب مطاعم «ماي كوين» و«شاورما
الريم» و«وافلشيوس». المنطقة اللي أمام بوابة الحديقة الدولية دي بقت زي مجمع
محلات أكلات سريعة، تركن عربيتك وييجي لك الجرسونات من كل محل من صف المحلات
الموجود، أو ممكن تتمشى وتنزل تقعد على واحدة من الترابيزات المرصوصة على الأرصفة
المقابلة. المهم أنك هـ تأكل أكل ساخن ولذيذ وبأسعار مهاودة.

محل «ع الخفيف» اسم على مسمى، المنيو كله عبارة عن ساندويتشات مكوناتها
بسيطة من اللحوم والدجاج والجمبري والحلاوة والقشطة والمربى، وفيه سلاطات وبطاطس
محمرة وبيبسي علشان لو عاوز تخلي الساندويتش بتاعك كومبو.

أخذنا مكاننا على ترابيزة في الشارع وقعدنا نتفرج على المنيو كثير واللي
فيه كل الساندويتشات متوفرة بحجمين أو ثلاثة وبأسعار بـ تبدأ من 3 جنيه وآخرها 19 جنيه للساندويتش.
وفي الآخر طلبنا من الجرسون يرشح لنا كام ساندويتش جامد من الحاجات الكثير اللي
عندهم، ورده كان جاهز طبعًا؛ كبدة ع الخفيف (3 جنيه) هي كبدة مطبوخة بطريقتهم الخاصة،
وشاورما البطاطس (4 جنيه) وده اختراع بـ يتم فيه تسوية البطاطس المحمرة على الجريل
بالجبنة الموتزاريلا بطريقة ونكهة الشاورما ومش هـ تلاقيها معمولة بالطريقة دي في
أي حتة ثانية. وفيه أصابع السجق الشرقي بالجبنة على الجريل (5 جنيه) وده كمان من
ابتكارات المكان. وكفتة السيخ المستوية على الجريل (8 جنيه). بالنسبة للساندويتشات
المميزة للمكان تقريبًا دي من المرات القليلة اللي نأكل فيها اختراعات من مكان لسه
فاتح جديد وتعجبنا بالشكل ده. كبدة ع الخفيف المطبوخة بالبصل والثوم كانت خرافية،
وشاورما البطاطس دي اختراع حقيقي، طعمها جديد وفريد والساندويتش مليان على آخره
وبـ نقول لكم لازم تجربوه. علشان نجرب معظم الأصناف اللي في المحل طلبنا الحجم
الصغير من كل ساندويتش وطلبنا الأصناف التقليدية زي الكبدة الإسكندراني والسجق
التركي المفروم والسجق الإسكندراني المدخن (3 جنيه). كل الساندويتشات من العيش
الفينو الطازج واللحوم كلها واضح أنها فريش ونظيفة، وبـ نقول الكلام ده لأن ناس
كثير بـ تقلق من أكل الكبدة والسجق خاصة في الشارع، وما كانش فيه مخ وقت ما
روحنا رغم أنه مكتوب في المنيو.

ممكن تضيف 7 جنيه لأي ساندويتش وتخليه كومبو، وفيه سلاطة خضراء وطحينة
ومخللات (3 جنيه للعلبة) وفيه طماطم مخللة بالثوم وبطاطس بالبقدونس وباذنجان وفلفل
مقلي (4 جنيه العلبة) وإحنا جربنا الطماطم المخللة والبطاطس دول وبـ نقول لكم أن
الطماطم تحفة والبطاطس مش قد كده.

بعد الأكل ممكن تأخذ لك واحد سكلانس حلاوة على قشطة على مربى أو شوكولاتة
نوتيلا بالموز والعسل (5 جنيه) علشان تقفل القفلة التمام.

فيه ساندويتشات عادية لو مش عاوز تدخل في قصة الكبدة والسجق، زي البرجر
بالبيض والجبنة والشيش طاووق والهوت دوج
والشاورما والجمبري البانيه وكبدة الفراخ، وممكن تطلب كبدة ومخ بانيه بالكيلو
(100 جنيه للكيلو المشكل). مطعم «ع الخفيف» أكله حلو بس الجرسون تأخر علينا شوية
لحد ما جاب لنا طلباتنا، لكن ده ما يمنعش أن الخدمة كانت مرحبة ومحترفة وأننا حبينا
المكان وقررنا يبقى من اختياراتنا المعدودة لأكلة خفيفة ورخيصة في آخر الليل.