The Definitive Guide to Living in the Capital , Cairo , Egypt

قاهرة المعز مليانة مطاعم لبناني، بس مش كتير منهم اللي استمروا في المنافسة لوقت طويل. جايز المشكلة الأساسية في منيو عنب بيروت إنها مش متنوعة، لكن الأكيد إنهم من أحسن المطاعم من ناحية الجودة والطعم المميز.

فرع عنب بيروت الكبير اللي بنتكلم عنه موجود في تيفولي دوم هليوبوليس ويتميز بأجواءه الهادية اللطيفة وده بفضل الرسوماتعلى الحيطان والأثاث، وطبعًا الفوانيس في السقف ومزيكا التسعينات والقعدة بشكل عام. عنب بيروت عندهم قعدة آوت دوور هايلة للفطار، أما الدور الأرضي فعامل زي غرفة المعيشة، وممكن تستخدموا الأسانسير أو السلالم لو عايزين تطلعوا الدور الأول المطل على الفوود كورت الخاصة بتيفولي واللي فيه ألوان وحيوية أكتر.

ابتدينا الدبكة مع طبق مقانق بدبس الرمان (49 جنيه) وتشيز رول بسطرمة (41 جنيه) ومشروبهم الشهير سموزي ليمون بالريحان (26 جنيه). وإحنا بنشرب الاختراع المنعش اللاذع اللي يفتح النفس من ريحة الريحان الجميلة ابتدينا ندوس في المقانق. المقانق أو السجق كانت مستوية كويس جدًا وجودتها واضحة، وكمان الصنوبر عمل طعم روعة مع صوص دبس الرمان اللاذع والمسكر في نفس الوقت؛ كل الحاجات دي عملت شغل عالي مع السجق وقدموا طبق للتاريخ.

نطلع على التشيز رول بالبسطرمة اللي أحسن حاجة نوصفها بيها هي سبرينج رولز على الطريقة اللبناني محشية كمية جبنة سايحة وبسطرمة محترمة وطعمهم حكاية.

تعالوا معانا نروح على الأطباق الرئيسية ونطلب شيش طاووق سبايسي (82 جنيه) وكبة لبنية (67 جنيه). قطع الفراخ المتبلة كويس ومش سبايسي قوي ومعاها بطاطس ويدجز مستوية تمام وخضار مشوي وصوص ثوم هايل كانت طرية جدًا ولها نكهة لذيذة. يمكن الأطباق الجانبية اللي مع الطبق مش على المستوى، بس الشيش طاووق كان تحفة.

نتكلم شوية عن الكبة المكونة من ثلاثة قطع كبة مقليين ومحشيين لحمة مفرومة وصنوبر وطبعًا التتبيلة الجامدة، ودول بيكونوا عايمين وسط صوص زبادي بنكهة الثوم وقوامه هايل. نقدر نقول إن الطبق اللي معاه رز أبيض كان هايل خصوصًا الكبة، لكن كان نفسنا يزودوا شوية نعناع يعمل طعم جامد لصوص الزبادي زي ما مكتوب في المنيو.

خلصت رحلتنا الممتعة لجبال لبنان مع حلاوة الجبن (39 جنيه) المعمولة من السميد والجبنة ولها قوام مطاطي. طبق الحلو المحشي كريمة ومرشوش عليه فستق حلو مع برطمان شربات محلى بماء ورد كان أحسن طريقة نختم بيها أكلتنا.

في النهاية صعب نشتكي من حاجة معينة في زيارتنا لعنب بيروت. يمكن المنيو محدودة شوية، بس الأطباق فعلًا معمولة بصنعة وكمان الديكورات هايلة، أما الخدمة فهي مسك الختام لتجربة لبنانية ساحرة.