The Definitive Guide to Living in the Capital , Cairo , Egypt

دخلنا المكان، وقعدنا جالنا “ويتر” اللي هو نفسه “الشيف”، وقررنا نبدأ بحاجة بسيطة، وطلبنا رغيف “عم حواوشي”، مضاف له جبنة موتزاريلا مع قوطة وبطاطس، وكنا متابعين الحواوشي وهي بتتشوي على الفحم، وفي خلال 15 دقيقة، الطلب كان نزل ومعاه كاتشب ومايونيز وكمان خيار مخلل، وأول ما دقنا الرغيف اللي كان بـ48 جنيه، اعتذرنا لنفسنا إننا مجربناش قبل كده المكان ده، لأن الطعم كان مميز جدًا، والبهارات كانت مظبوطة جدًا، والريحة تحفة، واللحمة كانت دايبة مع الموتزاريلا وتحس إنك بتاكل استيك فرنسي.

اتشجعنا وكإعتذار لنفسنا طلبنا رغيف حواوشي عادي، بـ30 جنيه، وكان كويس ولكن تحس أنه ناقصه حاجة بدون الجبنة أو الإضافات السرية اللي في البهارات، وكمان جربنا رغيف “حواوشي الشيف حسن” بـ50 جنيه، ودي كانت متغرقة في الجبنة الروسي والموتزاريلا، وطعمها كان أصلي، ويستحق أنك تاكل وتتمزج.

عم حواوشي عنده كمان فراخ وكفتة وكبدة وسجق وفاهيتا وبرجر، والحلو بتاعه أم علي وقرع عسل، بس للأسف مقدرناش نجرب حاجة بعد الحواوشي اللي أكلناها عنده علشان كنا شبعنا جدًا من جمال الطعم.

خرجنا من المكان البسيط وإحنا سعداء جدًا بالتجربة.