The Definitive Guide to Living in the Capital , Cairo , Egypt

مصر فيها أطعم وأجمل الأكلات، لدرجة أن كل موسم له أكل محدد عندنا، وبما أننا في الربيع وشم النسيم قرب فقررنا نمشي على خطى المصريين القدماء وعاداتهم وننقل لكم تجربتنا في أكل الفسيخ والرنجة من “عربية أبو هنا”، أشهر مكان في القاهرة لو هنتكلم عن الأسماك المملحة، وهو بيقدم أكلات شعبية زي الفسيخ والرنجة والبطارخ والبطاطس والجبنة القديمة وخلافه، “عربية أبو هنا” موجودة في منطقة الدرب الأحمر الشهيرة، اللي بتعد من أهم معالم القاهرة التاريخية، وكمان هو موجود جنب حلواني الحلمية صاحب أشهر بسبوسة في مصر.

المكان عبارة عن دكان صغير بعد ما كان عربية من سنة فاتت، وقدامه في الشارع مجموعة كراسي وترابيزات، وعندهم تيم بيشتغل بطريقة مميزة وسريعة وودودة، وكعادة أهالي المنطقة “ولاد بلد” وجدعان، ولو أنتم رايحين بعربية فماتقلقوش عندهم باركينج.

البداية كانت أننا طلبنا طبق بطاطس صغير بـ30 جنيه وكانت بلدي زي بتاعة البيت وحجمها كبير رغم الكمية القليلة، وطبق جبنة قديمة بـ30 جنيه وخلينا نعرفكم أنها كانت جميلة رغم أنها خفيفة، وكمان نزل لنا طبقة سلطة فيه خيار وبصل وليمون وجرجير مع الأكل.

ودخلنا على التقيل بقى بطبق سلطة رنجة صغيرة وسعرها 70 جنيه وطعمها كان حلو، وبعدها طبق فسيخ 4 قطع وده بيكون سعره حسب سعر اليوم ووقت الريفيو كان الطبق بـ125 جنيه، وكمان طلبنا 1 بطارخ مرملة وكان سعرها 70 جنيه وطبعًا ماتقلش طعامة عن الأكل اللي جربناه، ودخلنا بقى على الرنجة المشوية اللي مأكلناش زيها في مكان تاني، والأجمل إنها كانت نازلة من الشواية علينا، وفيها خلطة نقدر نقول عليها “رغم بساطتها هي سر صنعتها”.

المكان رغم أنه صغير لكنه قادر في كل مرة مايخيبش ظننا ولا مرة في أنه يبهرنا بأكله ويفرحنا بخدمته ومعاملته ومافيش مرة هتروحوا إلا وهتنبسطوا، وهما شغالين يوميًا من بعد الساعة 5 مساءً حتى الفجر.

للأسف هما ماعندهمش سوشيال ميديا ولكن تقدروا تتصلوا بيهم لو محتاجين دليفري خلال مواعيد العمل على رقم 01021132858.

العنوان: شارع سكة راتب – بجوار حلواني الحلمية وأمام مركز الشباب – الدرب الأحمر.