-
85 شارع حافظ رمضان
-
مصري
-
-
10 صباحاً - 2 صباحاً -
Waleed Abuarab
الاسم مألوف جدًا، ممكن تبقى مش عارف ده اسم مطعم ولا اسم شخصية في فيلم
كوميدي ولا مجرد لقب ممكن نطلقه على أي حد بـ يبيع كفتة. الحقيقة أنه طلع في
النهاية اسم المطعم اللي بـ نتكلم عنه النهاردة والموجود من حوالي 75 سنة. مطعم مشويات
«عبده كفتة» تم إنشاؤه سنة 1937 ومستمر لحد اليوم ده وله 3 فروع فقط في مدينة نصر
والمهندسين وفي مدينة بورسعيد.
رحنا فرع مدينة نصر الموجود في شارع حافظ رمضان المتفرع من شارع أحمد فخري،
أمام بوابة النادي الأهلي. المكان ما يتوهش، يكفي أنك تكون أمام بوابة النادي
وتسأل عن «عبده كفتة» وهـ تلاقي ألف من يدلك. المحل أشبه بمبنى مستقل بذاته، له
لافتة ضخمة مضيئة باللون الأحمر مكتوب عليها بخط النسخ اسم المحل.
المكان من الداخل شيك جدًا، أقرب لمطعم إيطالي أو كافيه من كونه مطعم كباب
وكفتة. مكون من دورين، والمساحة كبيرة وفيه نوعين من القعدات؛ ترابيزات الأكل
العادية وحولها الكراسي، وكنبات الركن المنخفضة والترابيزة المسطحة زي قعدات
الكافيهات، وساعتها سألنا وعرفنا أنك ممكن تقضي وقتك في المحل من غير ما تطلب أي
أكل وتطلب مشروبات الكافيه العادية، والمكان فعلًا مناسب لكده، يمكن اللي ممكن ما
يخليناش نعمل كده بس هو اسم المكان؛ عبده كفتة!
المنيو شرقي أصيل، فيه مختارات من الشوربة زي الكوارع والعدس والطماطم
ولسان العصفور بأسعار من 10 لـ 18 جنيه، والمقبلات فيها محاشي مشكلة كبيبة شامي
وأرز بأنواعه والأسعار من 12 لـ 18 جنيه، وفيه كل أنواع السلاطات من 5 لـ 9 جنيه.
نيجي بقى للأطباق الرئيسية اللي فيها طواجن الفتة باللحوم والكوارع والخضار
والمسقعة، شفنا الطواجن على ترابيزات حولنا وعرفنا أن حجمها كبير ومشبع جدًا لو
كانت لفرد واحد، أسعارها من 38 لـ 72 جنيه، وفيه الأطباق الشخصية أو البرسيون من
كل أنواع المشويات والحمام المحشي والدجاج وبأسعار من 32 جنيه لـ 73 جنيه لطبق
المكس جريل الخاص بعبده كفتة.
علشان نجيب من الآخر طلبنا كيلو من الكباب والكفتة علشان عندنا قناعة أن
الكبابجي مهما أبدع في صنف ثاني تفضل صنعة المشويات الأصلية هي مؤشر على مدى جودة
مأكولاته. الكيلو بـ 140 جنيه، الطعم حلو والتتبيلة خرافة خاصة في الكباب
المستوي كويس جدًا، لكن كفتة عبده كفتة ضخمة قوي، يعني صباع الكفتة أكبر من صباع
الممبار! صحيح الطعم حلو بس الحجم الرقيق مطلوب برضه، علشان كمان الطعم بـ يبان
أكثر كل ما سمك اللحوم يقل. طلبنا من منيو (البرسيون) طبق دجاج مشوية بالعظم
“غير مخلية” بـ 29 جنيه ومعاها أرز بسمتي والطبق ده ما كانش فيه غلطة من أول الطعم لحد السعر مقارنة بالكمية. جنب الأكل الرئيسي طلبنا طبق فتة سادة بالخل
والثوم والصلصة (12 جنيه) وكانت مش حلوة قوي لأنها كانت مززة بزيادة، السلاطة
الخضراء مقطعة قطع كبيرة وفريش وكمية الطبق كبيرة (9 جنيه) والباذنجان المخلل (7
جنيه) كان شكله في الطبق يفتح النفس لكن تتبيلته مش قد كده.
فيه ساندويتشات للتيك أواي وحلويات ومشروبات باردة وساخنة. الأكل تأخر
شوية قبل ما يبقى على الترابيزة أمامنا، لكن الطلب جاء مظبوط والخدمة بشكل عام
محترفة وراقية. والنظافة هي سمة المحل في كل تفاصيله.
«عبده كفتة» مكان مثالي للعائلات والتجمعات الكبيرة، ومناسب جدًا لو عاوز
تعزم حد على أكلة كباب في محل شيك، بس هـ تدفع أكثر من المعتاد شوية.
