The Definitive Guide to Living in the Capital , Cairo , Egypt

من حوالي سنة كتبنا مقال نقدي عن المطعم اللبناني طابون – Taboon لما كان في شارع طه حسين في الزمالك، مقالنا كان ملئ بسلبيات وملاحظات كثيرة معظمها مالوش علاقة بالأكل؛ زي النظافة والتهوية والخدمة. لما عرفنا أن المطعم عمل Rebranding (إعادة هيكلة يعني) وفتح في شارع أبو الفدا في برج أم كلثوم، قررنا نشوف إيه الجديد اللي ممكن يقدموه، وإذا كانوا عرفوا يحلوا مشاكل الفرع القديم.

التغيير بدأ من العلامة التجارية والديكور. وبما أن اللوجو الجديد لونه برتقالي، ألوان الديكور أغلبيتها دافئة بحوائط لونها أصفر، ترابيزات من الخشب الفاتح بنفس خامة ولون الأرضية، أما الكراسي المعدنية المودرن فألوانها برتقالي وأسود. مواجه للمدخل الكاونتر الرئيسي والمطبخ. جسم الكاونتر عليه مجموعة من قطع البلاط المنقوش. الحائط اللي على شمال الكاونتر فيه مجموعة من المرايا الصغيرة المبروزة وفي وسطهم شاشةLCD  كبيرة، أما الحائط اللي على اليمين فيه مجموعة من الأرفف التركواز اللي عليها مجموعة من قطع الديكور البسيطة. المكان الداخلي مساحته مش كبيرة، ووجود المطبخ وراء الكاونتر بكم المشويات اللي بـ تتعمل فيه كفيلة أنها تبوظ لك رائحة ملابسك لآخر اليوم. زي أي مكان بـ يطل على شارع أبو الفدا المساحة الخارجية هي مجموعة كراسي وترابيزات سوداء على الرصيف.   

المنيو كبير وفيه أطباق كثيرة، من ضمنها وجبات إفطار لبناني زي فتة الحمص بالزبادي (22 جنيه) وكومبو الفول والفلافل (35 جنيه) والبيض (35 جنيه). أما وجبات وأطباق بقية اليوم، فهي الأكلات اللبنانية المعتادة واللي ممكن تلاقيها في أي مطعم لبناني، المزات الباردة (10 – 25 جنيه) والساخنة (8 – 30 جنيه)، زائد السلاطات بأحجام مختلفة (25 – 35  جنيه) والشاورما بأنواعها.

أول حاجة لاحظناها أن المعاملة اختلفت تمامًا، ترحيب وسرعة في الأداء مع الاهتمام بالتفاصيل. وبما أن المكان لسه في مرحلة شبه الـ Soft Opening، ما اندهشناش كثير لما ما لقيناش حلو متوفر أو شاورما، واللي للأسف كان نفسنا نجربهم، وخصوصًا الحلو لأن في تجربتنا اللي فاتت برضه الحلو ما كانش متوفر.

كفاتح شهية طلبنا فطائر جبنة (20 جنيه)، وهي عبارة عن عجينة سمبوسك ملفوفة على شكل أصابع بالجبنة البيضاء وحبة البركة. الطبق مكون من أربع وحدات. طولهم مناسب ولكن توقعنا أن سمكهم يكون أكبر، درجة التسوية ممتازة وبداية خفيفة للوجبة. عيبهم الوحيد أن الجبنة كانت مفتقرة لأي نكهة مميزة وحبة البركة المحطوطة على أطراف الفطائر كميتها غير كافية لإضافة اللذوعة المطلوبة لطبق حادق.

من الأطباق الرئيسية طلبنا وجبة شيش طاووق (55 جنيه) وهو عبارة عن صدور دجاج متبلة بالليمون وزيت الزيتون. كمية الوجبة كبيرة وبـ بنزل معاها أرز أصفر، بطاطا حارة ومخلل وعيش لبناني. صدور الفراخ كانت أكثر من ممتازة، كل النكهات مضبوطة ومتجانسة مع بعضها؛ نكهتين قويتين زي زيت الزيتون والليمون لازم كميتهم تتضبط علشان مافيش نكهة تطغى على الثانية وده بالضبط اللي نجح الطبق في نظرنا، لأن التتبيلة الممتازة دي ساهمت كمان في طراوة الفراخ.

بالنسبة للأطباق الجانبية، الأرز كان عادي جدًا، مفتقر لنكهة تميزه عن أي طبق أرز أصفر ممكن تأكله عند أي مكان بـ يبيع مشويات. وبالرغم من أن تسويته تسمح أنك تأكله، إلا أن نوع الأرز اللي حبته طويلة زي اللي قُدم لنا كان يستاهل وقت أزيد في تسويته. البطاطا الحارة، وهي عبارة عن مكعبات بطاطس عليها خلطة بابريكا وثوم وكزبرة، عجبنا فيها الحجم الكبير لقطع البطاطس اللي كانت طرية من الداخل ومقرمشة من الخارج.

أما بالنسبة لوجبة كفتة أورفالي المشوية بالفلفل الأخضر والبصل (55 جنيه) واللي كان معاها نفس الأطباق الجانبية اللي في الطبق الأول، الكفتة كانت دون المستوى اللي توقعناه؛ اللحم تتبيلته قليلة جدًا ومافيهوش أي نكهة لا للفلفل أو البصل. العيش اللبناني المقدم مع الوجبات عيش ممكن تجيبه من أي سوبر ماركت، الفرق الوحيد أن كان عليه صلصة حراقة.

نقدر نعتبر أن طابون صحح أخطاء كثيرة زي النظافة والمعاملة؛ أما عن الأكل، فهو مافيهوش أي شيء مميز يخلينا نختار المطعم عن غيره من الأماكن الأخرى اللي بـ تقدم أكلات لبناني.