شياكة مع طعم أصيل.. 5 مطاعم غيرت شكل الفول والطعمية في القاهرة
أكل بلدي أكل مصري براندات أكل طعمية فطار مصري فول فول وطعمية مطاعم القاهرة مطاعم جديدة مطاعم فول شيك
Cairo 360
رنا شرف
النهارده هنتكلم عن أكلة مافيش مصري تقريبًا مابيحبهاش، أو على الأقل ماجربهاش مرة في حياته! أكلة متربطة باللمة والجدعنة، حاضرة في الفطار وممكن تكمل معاك للغدا والعشا كمان.. طبعًا بنتكلم عن طبق الفول وجنبه الطعمية والسلطة البلدي.. ياسلام!
في الفترة الأخيرة، لاحظنا إن فيه براندات كتير قدرت تخلّي الفول والطعمية مش بس أكل بلدي وخلاص، لأ، بقوا ترند! بقوا يتقدموا في أماكن شيك، بديكورات حلوة وأجواء لطيفة، تخليك مستمتع بالأكلة أكتر وأكتر.
وعلشان كده، جبنالكم 5 براندات جامدين للفول والطعمية، يناسبوا ذوق اللي بيحب الشياكة مع الطعم الأصيل:
زوبا
مطعم مشهور بين أكيلة الفول، ومش بس فول! عنده كمان كشري وملوخية وأكل مصري أصيل. بس شهرته الكبيرة جاية من الفول والطعمية المميزين. عنده بوكسات حلوة زي بوكس الطعمية: 30 قرص مع سلطة طحينة وبنجر، بسعر 258 جنيه.
ممكن تحسه غالي شوية، بس الطعم يفرق ويستاهل.
اطلب فطارك دلؤتي من عندهم من رقم: 16082
طبالي
براند فرض نفسه بقوة في عالم الفول والطعمية، بجودة عالية وأسعار معقولة. بيقدم سندوتشات فول بأكتر من طريقة: بزيت الزيتون، طحينة، معصفر وغيره. والمكان ديكوراته مميزة جدًا، ومناسبة للتصوير كمان!
اطلب فطارك دلؤتي من عندهم من رقم: 19061
الراعي
مطعم بيقدم الفول والطعمية بشكل شيك وأنيق. مش بس سندوتشات وأطباق، كمان عندهم طعمية مجمدة تجهزوها في البيت.
وبيقدموا سندوتشات تانية زي التركي والروزبيف.
اطلب فطارك دلؤتي من عندهم من رقم: 17292
تغاميس
براند بقاله فترة بيقدم فول وطعمية وجبنة بطماطم وبطاطس وبيض. عندهم وجبات متنوعة، من سندوتشات بسيطة لوجبات توفير. مثلا وجبة كاملة بـ187 جنيه بتاخد فيها سندوتش فول وطعمية وجبنة وبطاطس وبيض.
اطلب فطارك دلؤتي من عندهم من رقم: 15573
فول تانك
مكان بيقدم كل سندوتشات الفطار اللي بتحبها، وفول وطعمية بوكسات كمان. زي “بوكس تفويلة” اللي بيبدأ سعره من 117 جنيه، فيه فول وطعمية وجبنة وبيض.. فطار محترم وسعره معقول جدًا!
اطلب فطارك دلؤتي من عندهم من رقم: 16198
وأخيرًا..
مهما اختلفت البراندات أو اتغيرت طريقة التقديم، الفول والطعمية هيفضلوا أجدع أكلة مصرية بتجمعنا على حب الأكل البلدي الأصيل. سواء في جمعة حلوة مع أصحابك أو فطار هادي لوحدك، أكيد هيكون له طعم تاني مع شوية شياكة ونفس مصري أصيل.
جربوا الأماكن دي، وقولولنا إيه أكتر مكان منهم خطف قلبكم قبل معدتكم!
مقترح
معالم وسياحة
الهروب إلى سيناء.. دليلك لقضاء أجازة صيف ماتتنسيش في العريش!
السياحة في سيناء العريش +8
مطاعم
