شارع الحمرا – El Hamra ST
شارع الحمرا.. تجربة أكل لبناني ممتعة في وسط القاهرة
عنوان مطعم شارع الحمرا مطاعم شرقي في القاهرة مطاعم لبنانية في القاهرة مطاعم وسط البلد مطعم شارع الحمرا منيو شارع الحمرا-
17 شارع قصر النيل - تقاطع صبري أبو علم - بجوار عرفة
-
Mohamed Talaat
الأطباق اللبنانية من الأكلات المميزة واللي دايمًا ليها طعم خاص ماحدش يقدر يقاومه، وأهل القاهرة من عشاق الأكل اللبناني، ومؤخرًا ظهر مطعم جديد في وسط البلد، اسمه “شارع الحمرا”، على اسم أشهر وأهم شوارع بيروت! ورغم أننا شفناه بالصدفة إلا أننا قررنا فورًا نجربه وننقل لكم تجربتنا هناك، وخلال السطور الجاية هناخدكم معانا لرحلة أكل لـ “شارع الحمرا”.. جاهزين؟
المكان رغم أنه مش كبير إلا أنه عليه زحمة كتير، والأطباق معظمها بيقدمها شباب لبناني، والغريب أن المطعم مافيهوش أي ديكور يدل على لبنان نهائي، بالعكس هو مصري وكراسيه وترابيزاته خشب عادية جدًا مافيهاش أي افتكاسة، ودي حاجة استغربناها جدًا.
الخدمة في المكان، ورغم إن القائمين عليها لبنانيين، إلا إنها ماكنتش أحسن حاجة، وللأسف عبرنا عن ضيقنا أكتر من مرة بسبب البطء وبسبب عدم الاهتمام والدقة في نزول الطلبات.
بدأنا تجربتنا ببوكس سواريه 12 قطعة، وسعره 55 جنيه، وفيه قطعتين من كل نوع “زعتر – جبنه – سجق وجبنة – صفيحة – بيتزا – سبانخ”، ورغم أنها تعتبر مقبلات إلا أنها من جمالها وطعامتها تقدروا تطلبوها كوجبة هتشبعكم لو أنتم مش أكيلة.
كمان طلبنا وجبة عربي فراخ، وسعرها 45 جنيه، ودي كانت عبارة عن ساندوتش شاورما فراخ بالعيش اللبناني ومعاها بطاطس وثومية، وللأسف إحنا انخدعنا فيها لأننا كنا فاكرين إنها وجبة فراخ عادية مش شاورما، والمنيو مش موضح إنها شاورما، بس طعمها كان لذيذ.
وكمان جربنا فتة شاورما لحمة وسط بسعر 40 جنيه، وفتة شاورما فراخ كبيرة بسعر 56 جنيه، ودول الحقيقة يستاهلوا جائزة أجمل وأحلى أكلة شاورما لبناني في وسط البلد لأن طعمهم حكاية ومتسويين صح وطعمهم عظيم.
طلبنا معاهم كمان ساندوتش سجق لبناني وسعره 30 جنيه، ورغم انه ماكنش السجق المصري بتاعنا اللي عارفينه ولكن طلع سلامي، إلا أنه طعم كان حكاية ويستاهل التجربة.
تجربتنا بشكل عام كانت كويسة وشبعنا وانبسطنا من الأكل، ونتمنى أنهم الفترة الجاية يحسنوا من الخدمة ويدربوا فريق العمل علشان يكون أكثر احترافية ويقدر يتعامل تحت ضغط ومع الزحمة.
وخلونا نقول لكم شوية معلومات سريعة عن المكان؛ أولًا هم حاليًا ماعندهمش دليفري لسه لحد النهارده، ثانيًا، لو حبيتوا تاخدوا فتة من أي نوع معاكم تيك أواي فده ممنوع وللأسف مقدرناش نعرف السبب وكان رد الكاشير “تعليمات الإدارة”!
تقدروا تعرفوا عنهم أكتر من خلال صفحة الفيسبوك من هنا.
أو الإتصال برقم 0220001540.
