The Definitive Guide to Living in the Capital , Cairo , Egypt

رنا شرف

عارفين إن الشاورما لها عشاق كتير في القاهرة، وكمان التمشية في وسط البلد لها جمهور كبير، ومطعم “شارع الحمرا” اللبناني كان عنده فرصة كبيرة يقدم لجمهوره القاهرة متعة شاورما في قلب وسط البلد، لكن للأسف تجربتنا هناك نقدر نوصفها بجملة واحدة: تجربة أكل على قدها!

وإحنا بنتمشى في وسط البلد، لفت نظرنا زحمة أمام مطعم “شارع الحمرا”، اللي اسمه بيفكرنا ببيروت وجمالها، قولنا نجرب الشاورما هناك ونشوف هل الأمر يستاهل الزحمة دى كلها ولا إيه.

أول حاجة جربانها عندهم كانت شاورما فراخ، وكانت على الطريقة اللبناني، وللأسف كان الطعم مليان ثوم وماعجبتناش، ودي سعرها 84 جنيه. ماحسيناش إنها مخدومة صح، ولا بتنقل لنا سحر بيروت.

تاني حاجة جربنها كانت شاروما سجق لبناني، ودي شبه البسطرمة كدا، ونقدر نقول إنها معقولة، وحسينا إنها عوضتنا عن شاورما الفراخ اللي كانت مخيبة للآمال، والخيار المخلل كان مديها طعم موديها في عالم تاني، وسعرها كان 100 جنيه.

تالث حاجة جربناها هي شاورما لحمة لبناني، وكانت برضه معقولة، واللحمة مستوية ومعاها برضه خيار مخلل، بس بصراحة العيش لو كان صاج بدل الشامي كانت التجربة هتكون أجمد، ودي سعرها 101 جنيه.

جربنا كمان من عندهم سندوتش بطاطس صاج، وللأسف مش أجمد حاجة! الطعم خلانا نحس إننا بنأكل باذنجان مش بطاطس، وده لأن السندوتش فيه خيار مخلل بس! سعره 59 جنيه.

الخدمة في المكان بطيئة، ويمكن هو ده اللي عامل زحمة كبيرة هناك. والتجربة بشكل عام مش أفضل حاجة، لكن أكيد هنجربه مرة تانية علشان نشوف فيه تطور ولا لأ.