The Definitive Guide to Living in the Capital , Cairo , Egypt

بيان عاجل: مطعم “سيزلر-Sizzler” فتح أجدد فروعه في الدور الأخير من المرحلة التانية في سيتي ستارز مكان مطعم ماكاروني. المكان هناك شيك وراقي وتحس فيه بنوع من الفخامة، خصوصًا مع الأرضيات والأثاث الخشبي والنور الهادي خالص مع الفاصل الكبير اللي بيقسم المكان نصين علشان يوفر نوع من الخصوصية.

أول حاجة وصلت كانت سلة عيش (12 جنيه) عبارة عن أربعة عيش وطبق صغير فيه زبدة زيتون متقطع. العيش كان مقرمش من بره وطري من جوه وواضح إنه طازة، ويا سلام لما تغمسه في الزبدة وتستمع بالطعم اللذيذ.

بعد كده دخلنا على المقبلات وطلبنا سيزلر كومبو (120 جنيه) وصل بعد ربع ساعة في طبق كبير فيه كل حاجة من منيو المقبلات: موتزاريلا ستيكس وكوردون بلو وسبرينج رولز وويدجز ومشروم مقلي، وبتختار إما ثمانية تشيكن ستريبس أو سويت تشيلي تشيكن،  فقررنا نطلب الأخير. كل الكلام ده معاه أربعة صوصات: هوني مسطرد و1000 أيلاند وباربيكيو وبلو تشيز.

الموتزاريلا ستيكس كانت مقرمشة شوية والجبنة فيها سخنة، ويا عيني عليها مع صوص 1000 أيلاند والنكهة المسكرة مع الحادقة. أما السبرينج رولز فكانت مقرمشة جدًا من بره، ومحشية شوية خضار حلوين.

الويدجز كان عليها جبنة سايحة وقطع بيكون وكانت معجنة شوية، بس ده ما يمنعش إن طعم البطاطس مع الجبنة كان حلو وخصوصًا لما تغمسها في صوص الهوني مسطرد. بعدها جربنا المشروم المحشي جبنة جميلة عملت شغل عالي ومكانش مزيت بزيادة.

بصراحة عمرنا ما شوفنا كوردون بلو بينزل مع المقبلات – ودي طبعًا حاجة حلوة – وهو عبارة عن كرات فراخ محمرة محشية بيف مدخن وجبنة. الفراخ كانت متحمرة كويس وطرية، وطبعًا طعم البيف المدخن مع الجبنة عملوا أكلة حكاية مع السويت تشيلي بيف تشيكن، وبصراحة الاتنين ممتازين من ناحية التوابل والبهارات.

عشر دقائق كمان وبدأت الأطباق الرئيسية توصل، والبداية مع سيزلر جريلد فيليه (150 جنيه). الطبق عبارة عن قطعة فيليه 340 جرام غرقانة صوص كريمة مشروم وبينزل معاه خضار سوتيه. اللحمة كانت مستوية كويس وواضح إنها طازة وجودتها عالية، وكمان طعم المشروم أضاف طعم حادق مميز للطبق.

تاني طبق معانا هو مشروم بيف (90 جنيه) واكتشفنا إنه بيف ستروجانوف. شرائح البيف عايمة في المشروم ومعاها مشروم سوتيه، والميزة إن طعمهم حلو وفي نفس الوقت مش طاغيين على طعم البيف نفسه.

أخر طبق وصل كان سيزلر فرايد تشيكن بالمرقة (90 جنيه)، وده قطعتين صدور فراخ مقلية عليهم مرقة وبينزل مع الطبق بطاطس محمرة ورز أبيض. يمكن الفراخ كانت طرية وتتبيلتها حلوة، بس الجلد كان بيعمل لنا مشكلة وإحنا بنقطع الفراخ ومعرفناش نستمتع بالقرمشة.

سيزلر بصراحة عاملين شغل عالي من كل النواحي، سواء الخدمة اللي بيقدمها فريق عمل على أعلى مستوى، أو من الأكل والاحترافيه في الطبخ والتنفيذ، أو الجو العام للمكان، والكلام ده معناه إن في مكان جديد هيشد ناس كتير مش بس للمطعم أو لمنطقة المطاعم اللي فيها، لكن للمول كله اللي هيستفيد من مكان بالقوة دي.

ويفضل السؤال المهم: هل سيزلر بيقدم حاجة خارقة للطبيعة؟ لأ، بس مع الخدمة الممتازة والأكل الرائع والأجواء الممتعة أكيد سيزلر يعتبر إضافة هايلة لأسرة مطاعم سيتي ستارز.