The Definitive Guide to Living in the Capital , Cairo , Egypt

كتب: مصطفى فتحي

“سيخ مشوى” مطعم موجود على كورنيش النيل في منطقة العجوزة، المكان مثالي لأي حد بيبحث عن مطعم شرقي بيقدم أكلات مصرية أصلية مميزة وفي نفس الوقت بيحب يتفرج على منظر نيل القاهرة الرائع.

لما فكرنا نروح سيخ مشوى فاضلنا بينه وبين مطاعم كتير على الكورنيش ولأنه من أحدث المطاعم هناك قررنا نختاره، المكان مميز جدًا وموجود بالقرب من مطعم “سي جل” للأكلات البحرية و”لاتينو كافيه”، وبتنزل له بسلالم لحد ما بتوصل للصالة بتاعته.

المكان مساحته واسعة جدًا، وبيتكون من صالة المطعم المقفولة ومنطقة الأوت دور اللي اختارنا تكون قاعدتنا فيها لأنه ما ينفعش نبقى في مطعم على النيل ونبعد عن منظر المياه المحبب للنفس، وفعلًا المكان بيقدم إطلالة هايلة ومنظر تحفة على النيل، وديكوراته مريحة للعين، الكراسي باللون الأبيض مع الإضاءة الهادية بتخلق جو رومانسى جدًا مناسب لخروجة حلوة مع حد بتحبه.

ندخل على المفيد، المنيو فيها أطباق كتير ما بين طواجن وأطباق مشاوي، وكمان أكلات مشوية زي البط والرومي، وطواجن الملوخية وطواجن اللحم اللي بالبصل وغيره من الأكلات الشرقية، وبما أن اسم المكان “سيخ مشوي” فكان لازم نجرب أكبر قدر من المشويات، فطلبنا فرخة مشوية ودي عجبتنا جدًا الحقيقة لأن التتبيلة بتاعتها مظبوطة وكمان طريقة تقديمها مميزة، لأنها بتجيلك على شواية وبالتالي بتكون سخنة جدًا طول ما أنت بتاكلها، ودي سعرها “129جنيه”.

طلبنا كمان طبق الكفتة المشوية ودي بتتقدم بنفس طريقة الفراخ، على شواية مخصوص، طلب الكفتة كان عبارة عن أربع صوابع فقط ودي كمية قليلة جدًا، لكن طعمها حلو وتوابلها مظبوطة لكن حسينا سعرها مبالغ فيه “64جنيه” والكمية زي ما قولنا قليلة.

حبينا كمان نجرب طواجن “سيخ مشوى” علشان نعرف هل هتكون مختلفة عن طواجن المطاعم اللي جربناها قبل كدة ولا لأ، فطلبنا طاجن لحم بالبصل وصوص الباربكيو، والحقيقة أن الطجن مميز وطعمه رائع، ومعمول بفن حقيقي، سعره “68جنيه”، وجالنا معاه  طبق أرز بالشعرية كان طعمه كويس لكن الكمية كانت قليلة جدًا.

نيجي بقى للأطباق الجانبية، حبينا نجرب السامبوسك، ودي للأسف طعمها ما كانش حلو، وكانت باردة بعكس باقي الأكل، وخلطة التوابل والخضرة اللي محشية بيها اللحمة المفرومة ما كانتش مظبوطة خالص، وبرضه كانت الكمية قليلة حوالي أربع قطع فقط رغم أن سعرها “23 جنيه”، لكن طريقة تقديمها على سرافيس خشب هي اللي عجبتنا.

نزل لنا كمان طبق محشي مشكل عبارة عن قطعتين محشي كرنب وقطعتين محشي ورق عنب وقطعة واحدة محشي فلفل والحقيقة أن مستوى المحشي ما كانش مميز، كمان السعر بالنسبة للكمية كان مبالغ فيه قوي “29 جنيه”.

طلبنا الحلو كنافة بالآيس كريم، ودي طعمها عجبنا جدًا، عبارة عن قطعة آيس كريم مضاف عليها كنافة بالكريمة ودى سعرها “38جنيه”.